"Belə ucuz oyunlara alət etmək cəhdləri..."

Millət vəkili: "Azərbaycan bu mötəbər yarışlara ən yüksək səviyyədə ev sahibliyi edəcək"

"Avropa Olimpiya Oyunlarının Bakıda keçirilməsi ölkəmizin çox böyük tarixi uğurudur. Bu, müstəqilliyinin cəmi 24 yaşı olan bir dövlətə böyük etimad, böyük inamdır. Bununla belə, hesab edirəm ki, belə möhtəşəm idman tədbirinin keçirilməsi üçün məkan olaraq Azərbaycanın seçilməsinə ciddi əsaslar var". Milli.Az SİA-ya istinadən xəbər verir ki, bu fikirləri Azərbaycanın Avropa Şurası Parlament Assambleyasında (AŞPA) nümayəndə heyətinin üzvü, qurumun alt komitəsinin sədri Sahibə Qafarova assambleyanın yaz sessiyası çərçivəsində keçirilən iclasda çıxışı zamanı ölkəmizin Avropa oyunlarına hazırlığı ilə bağlı görülən işlərdən danışıb.

Sahibə Qafarova Azərbaycanın bu mötəbər yarışlara ən yüksək səviyyədə ev sahibliyi edəcəyini qeyd edib: "Müasir Azərbaycan dövləti qısa zamanda böyük uğurlara imza atmaqla yerləşdiyi Cənubi Qafqaz regionunun lider dövlətinə çevrilib. Azərbaycan dövlətinin bu uğurlarının mərkəzində dayanan əsas amil isə istər daxili, istərsə də xarici arealda sabit, milli maraqlara söykənən, vətəndaşlarının hüquq və azadlıqlarının genişləndirilməsini özündə əks etdirən, həmçinin, xarici təşkilatlar və dövlətlərlə əlaqələrinin normal tərəfdaşlıq çərçivəsində inkişafına nail olan siyasətin həyata keçirilməsidir. Məhz bu, Azərbaycanın siyasi-iqtisadi inkişafı ilə yanaşı, ölkəmizin beynəlxalq aləmdə yaxın tərəfdaş, etibarlı müttəfiq kimi tanınmasında əhəmiyyətli rola malik olub. Bu gün Azərbaycan həm də dünya miqyasında idman ölkəsi kimi tanınmaqda və Azərbaycanda idmanın inkişafı mütəmadi səciyyə daşımaqdadır. Azərbaycanın artıq ilk Avropa oyunlarını qəbul etməyə hazırdır".

Millət vəkili onu da vurğulayıb ki, Oyunların keçirilməsi ilə bağlı paytaxtımızda bütün zəruri işlər tamalanıb, güclü infrastruktur yaradılıb: "Azərbaycanın birinci xanımı Mehriban Əliyevanın rəhbərlik etdiyi Avropa Oyunları təşkilat komitəsində çalışan peşəkar komanda çox qısa bir müddətdə 3 il ərzində demək olar ki, öz işini yekunlaşdırmaq üzrədir. Baxmayaraq ki, bu səviyyəli idman yarışlarını təşkil etmək üçün dövlətlərə bəzən 7-8 il vaxt lazım olur, amma Azərbaycan bu işin öhdəsindən cəmi 3 il ərzində gəlib. Təsadüfi deyil ki Avropa Olimpiya Komitəsinin və digər beynəlxalq idman federasiyaların rəhbərliyi paytaxtımızda görülən işləri çox yüksək qiymətləndirib və vurğulayıblar ki Avropa Olimpiya hərəkatının standartları Bakıda müəyyənləşəcək. İndi Bakı idmançıları və olimpiya ruhunu yaşamaq üçün paytaxtımıza üz tutan qonalranı salamlamağı səbirsizliklə gözləyir. Çox təəssüf ki, belə bir ərəfədə bəzi siyasi dairələr ədalətsiz və qeyri obyektiv şəkildə olimpiya oyunlarını siyasiləşdirməyə, ölkəmizə qarşı həqiqətdən uzaq ittihamlar səsləndirməyə çalışırlar. Biz bu kampaniyanın daha əvvəllər də, ölkəmizdə Eurovision mahnı müsabiqəsinin keçirildiyi vaxtda da şahidi olmuşuq. Azərbaycan xalqı burada yatan əsas məqsədin də nədən ibarət olduğunu yaxşı dərk edir. Bildirmək istəyirəm ki, ölkəmizə qarşı bu cür təzyiqlər qəbul olunmazdır və o, hədəflədiyi nəticəyə çata bilməyəcək. İdman, olimpiya hərəkatını belə ucuz siyasi oyunlara alət etmək cəhdləri də əlbəttə ki, cəmiyyətimiz tərəfindən qətiyyətlə pislənilir".

Sahibə Qafarova, həmçinin avropalı parlamentariləri ölkəmizin, o cümlədən Avropanın idman tarixində çox mühüm hadisə olan ilk Avropa Oyunlarını izləmək üçün Bakıya dəvət edib: "Bu, bizim sülh, barış, dostluğa söykənən olimpiya ruhuna sadiqliymizi nümayiş etdirməklə yanaşı, xalqımızın çox zəngin mədəniyyəti, dövlətimizin uğurlu inkişafının ortaya çıxardığı müasir reallıqlarla tanışlıq imkanı verəcəkdir".

Milli.Az