Siyasət

"Azərbaycanın ordu quruculuğundakı addımlar..."

29 Oktyabr 2014 13:33
Baxış: 863
#AZERBAİJAN #SİYASƏT #İÇ SİYASƏT
"Bu gün aydın məsələdir ki, Azərbaycanın dövlət büdcəsi Ermənistanın büdcəsindən dəfələrlə çoxdur və günü-gündən daha da artmaqdadır. Azərbaycan ordusunun güclənməsi, ölkə büdcəsinin artırılması, eyni zamanda ölkənin müdafiə sənayesinin inkişaf etdirilməsi Azərbaycanın ordu quruculuğundakı ciddi addımlardan xəbər verir. Təbii olaraq, bütün bunlar Ermənistanda ciddi narahatlıqlara səbəb olur". Bu fikirləri SİA-ya açıqlamasında Bütöv Azərbaycan Xalq Cəbhəsi Partiyasının sədr müavini Elçin Mirzəbəyli deyib.

O bildirib ki, Azərbaycanın hərbi büdcəsinin artırılması və hərbi potensialının gücləndirilməsi təkcə Ermənistan vətəndaşlarını deyil, həmçinin işğalçı ölkənin siyasi dairələrini də narahat edir: "Bu narahatlıq Ermənistanda keçirilən aksiyalarla, təşkil edilən debatlarla yanaşı, beynəlxalq təşkilatların tədbirlərində də səsləndirilir. Sözsüz ki, nə qədər Azərbaycan torpaqları işğal altında olacaq, Ermənistan özünün işğalçı mövqeyindən əl çəkməyəcək, Azərbaycan da silahlı qüvvələrin döyüş qabiliyyətinin artırılması üçün mühüm addımlar atacaq. Qarşı tərəf də bunu birmənalı şəkildə qəbul etməlidir. Hər dəfə Azərbaycanın ordu quruculuğunun inkişafı haqqında məlumatlar yayılanda Ermənistan əhalisinin əhəmiyyətli hissəsi, xüsusən də gənclər ölkənin sərhədlərini tərk edib başqa ölkələrdə yaşamağa üstünlük verirlər. Bu da Ermənistanda demoqrafik vəziyyətin həyəcan doğuracaq səviyyəsinin statistik göstəricilərdə belə qeyd olunmasına gətirib çıxarır. Artıq başa düşməlidirlər ki, işğala son qoyulmayanadək Ermənistanın başı üzərindən bu qorxu çəkilməyəcək".


Milli.Az

 

Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.