Azay Quliyev Yunanıstanın tanınmış jurnalına müsahibə verdi

Yunanıstanın tanınmış beyin mərkəzlərindən olan "ELİAMEP-Middle East Mediterranean"in rüblük hesabatı olan "ELİAMEP" jurnalının sonuncu sayı Azərbaycana həsr olunub.

Trend-in məlumatına görə, böyük tirajla yayımlanan "ELİAMEP" dərgisində, əsasən, geosiyasi və iqtisadi analitik yazılar, Yaxın Qərb ölkələrinin siyasi situasiyası, inkişaf perspektivləri haqqında məqalələr, şərhlər, müsahibələr verilir.

Jurnalın bu sayında Prezident yanında QHT-lərə Dövlət Dəstəyi Şurasının sədri, ATƏT Assambleyasının Siyasi Məsələlər və Təhlükəsizlik Komitəsinin sədr müavini, millət vəkili Azay Quliyevlə geniş müsahibə verilib.

Müsahibədə 2013-cü il prezident seçkilərindən sonra Azərbaycanın iqtisadi-siyasi, sosial inkişafı, TAP enerji layihəsində, habelə Cənubi Qafqazda reallaşan digər layihələrdə Yunanıstanın rolu ilə bağlı suala aydınlıq gətirilib, Qara Dəniz QHT Forumunun gələcək perspektivi haqqında fikir mübadiləsi aparılıb.

Müsahibədə daha çox diqqət çəkən məqam Dağlıq Qarabağ problemi ilə bağlı verilən suallar və suallara ətraflı cavablardır. A.Quliyev problemin mahiyyəti, Ermənistanın işğalçılıq siyasəti, danışıqlarda tutduğu qeyri-konstuktiv mövqe, danışıqların məqsədli uzadılmasının səbəbləri barədə ətraflı və dəqiq informasiya verib.

Sonda Dağlıq Qarabağın mirvarisi, "konservatoriyası" sayılan Şuşa haqqında da danışılıb, Şuranın reallaşdırdığı "Şuşaya Azadlıq" kampaniyasından söz açılıb.

Qeyd edək ki, jurnalın bu sayında Azərbaycannın Yunanıstandakı səfiri Rəhman Mustafayevin "Azərbaycan-Yunanıstan əlaqələri 2013-də: ikitərəfli əlaqələr üçün yeni imkanlar", Cənub-Qərbi Avropa üçün Enerji İnstitutunun icraçı direktoru Kostis Stambolisin "Enerji tərəfdaşlığı və uzun müddətli planlama: Azərbaycan qazının Avropaya nəqlində Yunanıstanın əsas rolu", ELİAMEP-in rəhbəri Corc Tsoqopoulosun "Azərbaycanın Avropa istiqaməti" və "Middle East Research Project"in rəhbəri Evangelos Venetisin "Mədəni və siyasi naxışlar: Afina və Bakı arasında əlaqələr" analitik yazıları da yer alıb.

Milli.Az