Siyasət

Ermənistan 2020-ci ildən sonra üç il Qarabağa mina daşıyıb - Nazir

10 May 2025 12:33

Baxış: 533

#ERMƏNİSTAN #MİNA

Ermənistan 2020-ci ildən sonra üç il Qarabağa mina daşıyıb.

Trend xəbər verir ki, bunu bu gün Azərbaycanın xarici işlər naziri Ceyhun Bayramov Ümummilli Lider Heydər Əliyevin 102 illiyi ilə bağlı Fəxri xiyabanı ziyarət edərkən jurnalistlərə açıqlamasında deyib.

"2020-ci ilin noyabr ayından sonra azad olunmuş ərazilərimizdə 400-ə yaxın mina hadisəsi baş verib. 70 nəfərə yaxın vətəndaş həyatını dəyişib və ya ağır bədən xəsarətləri alıb. Baş verən bu partlayışların yarısından çoxu o ərazilərdə baş verib ki, onlarla bağlı ümumilikdə heç bir mina xəritəsi təqdim edilməyib.

Üçtərəfli bəyanatın müddəalarına zidd olaraq, Azərbaycan tərəfi Laçın yolunda nəzarəti ələ almayana kimi 2020-ci ildən etibarən 3 ilə yaxın bir müddət ərzində qanunsuz şəkildə, baxmayaraq ki, həmin yol yalnız humanitar məqsədlər üçün istifadə olunmalı idi, Ermənistan davamlı şəkildə Qarabağa minalar daşıyırdı.

Həmin zamanda sülhməramlıların yerləşdiyi ərazidə bütün perimetr üzrə çox böyük sahələr 2020-ci ildən sonra yenidən minalanıb. Bu da birmənalı şəkildə həm beynəlxalq humanitar hüququn, həm Ermənistanın 2020-ci ildə üzərinə götürdüyü öhdəliklərin kobud şəkildə pozuntusudur".

Milli.Az