Siyasət

Güclü qasırğa gəlir - Ərdoğandan "iqtisadi böhran" şərhi

9 Aprel 2025 14:40

Baxış: 1 976

#DÜNYADA #SİYASƏT #İQTİSADİYYAT #BƏXTİYAR UMARLI

Türkiyə Prezidenti Rəcəb Tayyib Ərdoğan partiyasının TBMM-dəki iclasda gündəmdəki məsələlərlə bağlı açıqlamalar verib.

Milli.Az xəbər verir ki, ABŞ-nin idxal rüsumlarını artırmasını şərh edən Ərdoğan yeni mübarizə dövrünün başladığını deyib. O bildirib ki, beynəlxalq siyasətdə bütün oyunçular yeni axtarışlara çıxıb və ticarət müharibələrinin təsiri açıq şəkildə hiss olunmağa başlayıb. Ərdoğanın sözlərinə görə "böyük-kiçik demədən hər kəsi təsir altına alacaq bir qasırğa gəlir demək mübaliğə olmaz."

Ərdoğan qeyd edib ki, köhnə qlobal sistemin bünövrəsi sarsılır və dövlətlər hər yerdə cəmiyyət və iqtisadiyyatı gücləndirmək üçün tədbirlər görür. O vurğulayıb ki, Türkiyə bu yeni dövrə hazırlaşan və onu ən yaxşı anlayan ölkələrdən biridir.

Ərdoğanın sözlərinə görə Türkiyə artıq müxtəlif beynəlxalq platformalarda daha çox ön plana çıxır və Türkiyəsiz heç bir qlobal hesab qurulması mümkün deyil. O, ölkəsinin son 23 ildə qurduğu infrastrukturla bu yeni dövrə damğa vurduğunu bildirib.

Son bir həftədə beynəlxalq ticarət müharibələrinin yeni mərhələyə keçdiyini deyən Ərdoğan gömrük tarifləri ilə bağlı qarşıdurmaların qızışdığını və kapital bazarlarında hələ də dalğalanmaların davam etdiyini vurğulayıb. Ərdoğan bildirib ki, bu proses inflyasiyanın yüksəlməsinə, bazarlarda etimadın azalmasına və əmtəə qiymətlərində dalğalanmalara səbəb ola bilər.

Bəxtiyar Umarlı
Milli.Az