İran dağıla bilər, Tramp bunu istəmir- Təhlil

"İran Prezidenti Məsud Pezeşkian Buşehr vilayətinə səfəri zamanı bildirib ki, ABŞ və İsrail İrana hücum etməyə cəsarət etsə, Tehran indikindən yüz dəfələrlə çox nüvə obyekti inşa edəcək. "ABŞ və İsrail bizim nüvə mərkəzlərimizə zərbə endirməklə hədələyir. Onlar binalara zərbə endirə bilər, lakin onları inşa edən "beyinləri" vura bilməzlər. Qoy yüz mərkəzə zərbə endirsinlər, minlərlə eyni mərkəz yenidən tikiləcək", - İran prezidenti qeyd edib.

Daha əvvəl "The Wall Street Journal" qəzeti xəbər vermişdi ki, ABŞ kəşfiyyat agentliklərinin məlumatına görə, İsrail Tehranın zəifləməsindən istifadə etməyə çalışaraq 2025-ci ildə İranın nüvə obyektlərinə genişmiqyaslı zərbələr endirmək imkanını nəzərdən keçirir.

ABŞ Prezidenti Donald Tramp fevralın 10-da bəyan edib ki, İranı nüvə silahı hazırlamaqdan ya bombalar vasitəsilə, ya da müqavilə imzalamaqla dayandırmaq olar. Amerika lideri əlavə edib ki, İslam Respublikası ilə hərbi zərbələrə əl atmadan saziş bağlamaq olar".

Milli.Az xəbər verir ki, bunu siyasi şərhçi Kənan Novruzov deyib.

O bildirib ki, əslində İsrail İranı müharibəyə çəkmək istəyə bilər. Amma Təl- Əviv Vaşinqtonun dəstəyindən əmin deyil. Ona görə də narahatdır.

"Ümumiyyətlə, ABŞ İsrailə onun istədiyi səviyyədə dəstək vermir. Çünki İranın parçalanması an məsələsidir.
Doğrudur, Tramp İrana qarşı sərt mövqeyi ilə seçilir. Çünki o, sələfinə nisbətən İsrailə və yəhudi lobbisinə daha yaxındır. Buna baxmayaraq, ABŞ İranın dağılmasında maraqlı deyil. Çünki Tehran ərəb dünyası ilə əlaqələr üçün Vaşinqtona lazımdır. Beləliklə, Ağ Ev İranla münasibətlərdə kifayət qədər həssas davranır. ABŞ-nin İsrailin İrana mümkün hücumunda dəstəyini də istisna etsək, deməliyik ki, yaxın gələcəkdə Tehrana nə Təl- Əviv, nə də Vaşinqtondan ciddi hərbi təhdid var. Buna baxmayaraq, ABŞ xüsusilə iqtisadi baxımdan İrana təzyiqləri davam etdirəcək".

Asya
Milli.Az