Aİ missiyasının Ermənistan "sevdası" - Müddəti uzatmaq məqsədləri üzə çıxdı - AÇIQLAMA

Avropa İttifaqının (Aİ) səfirləri Ermənistandakı müşahidə missiyasının iki il müddətinə uzadılmasını təsdiqləyiblər.

Milli.Az xəbər verir ki, bu barədə Ermənistan KİV-i məlumat yayıb.

Bu qərara əsasən, avropalı müşahidəçilər daha iki il - 2027-ci il fevralın 19-dək Ermənistanın sərhədyanı rayonlarında qalacaqlar.

Müqavilə layihəsində müşahidəçilərin tərkibinin və sayının dəyişməz qalacağı (165 xarici və 44 erməni üzv) nəzərdə tutulur.

Ermənistandakı missiyanın məlumatına görə, bu qərar yaxın vaxtlarda Aİ-yə üzv ölkələrin xarici işlər nazirləri tərəfindən təsdiqlənməlidir.

Məlum olduğu kimi, Aİ missiyası 2023- cü ildə Ermənistanda yerləşdirilib və müntəzəm olaraq genişlənir.

Bəs məqsəd nədir?

Mövzunu Milli.Az-a siyasi şərhçi Kənan Novruzov şərh edib:

"Missiyanın məqsədi Ermənistanın sərhədyanı ərazilərində sabitliyi təşviq etmək, yerlərdə etimad yaratmaq və Ermənistanla Azərbaycan arasında münasibətlərin normallaşdırılması səyləri üçün əlverişli mühiti təmin etmək idi. Buna baxmayaraq, ötən müddət ərzində İrəvan nəinki bu öhdəliklərini yerinə yetirmədi, həm də kəşfiyyat və diversiya işləri ilə məşğul oldu".

O bildirib ki, əslində missiyanın Ermənistana yerləşdirilməsində əsl məqsəd də elə budur: Aİ - nin Cənubi Qafqaza soxulması və proseslərə müdaxilə etməsidir.

"Əvvəl də dediyimiz kimi, Qərb oyunçuları, o cümlədən Aİ Cənubi Qafqazda sülh və sabitlik istəmir. Əks halda buna çoxdan nail ola bilərdi. Ən azından regional əməkdaşlıq mühitinin təmin olunmasına töhfə verirdi. Aİ isə bunun əksini edir, Ermənistanlı silahlandırır.

İttifaqın Ermənistana missiya göndərməsi də məhz buna- gələcək təxribatçı fəaliyyətə yönəlmişdi. İndi missiyanın fəaliyyət müddətinin uzadılması göstərir ki, Aİ regionla bağlı məkrli planlarından əl çəkməyib. Əksinə, gələcəkdə məhz missiya vasitəsilə kəşfiyyat məlumatlarının əldə olunaraq Ermənistana ötürülməsi, habelə təxribatçı addımların atılması mümkündür. Bu isə regional sülhə yo, yeni gərginliyə rəvac vermək deməkdir".

Aysel Əkbər
Milli.Az