Azərbaycanda Mixail Qorbaçovun tərəfdarı peyda olub - VİDEO

Bu günlərdə Azərbaycanın vətəndaş cəmiyyəti təmsilçiləri, ictimai fəalları, 20 Yanvar şəhidlərinin ailə üzvləri, 20 Yanvar veteranları Norveç Nobel Komitəsinin sədrinə və üzvlərinə Açıq Məktub ünvanlayaraq Mixail Qorbaçovun hələ də Nobel Sülh Mükafatı laureatı adını daşımasını bu mükafatın tarixində ən böyük ədalətsizlik adlandırıblar.

Müraciətdə bu qara ləkəni təmizləmək, Azərbaycan xalqına qarşı yol verilmiş haqsızlığı aradan qaldırmaq, Mixail Qorbaçovun həmin mükafatdan məhrum edilməsi tələb olunub.

Bu kütləvi müraciət Rusiyada müəyyən hakim dairələri ciddi narahat edib. Daim Kremlin Bakıdakı təbliğatçısı rolunda çıxış edən, SSRİ xiffəti ilə yaşayan, bütün fəaliyyəti ilə 20 Yanvar fəlsəfəsinə zidd olmasına baxmayaraq, hansısa gizli himayə vasitəsilə 2024-cü ilədək "20 Yanvar Şəhid Ailələrinin Hüquqlarının Təmin Olunması" İctimai Birliyinin sədri kimi fəaliyyət göstərməyə nail olmuş Maral Zamanova (Maral Qocaman) bu müraciətin əleyhinə çıxaraq, Mixail Qorbaçovdan bu mükafatın alınmasına qarşı çıxıb. O, sosial mediada 20 Yanvar şəhidlərinin ailə üzvləri, 20 Yanvar veteranlarına video ilə müraciətində belə deyib: "Niyə indi? Niyə məhz Azərbaycan Rusiya ilə müttəfiq olandan sonra? Bizim Qələbə, Zəfər günümüzdə Azərbaycan bayraqları ilə Rusiya bayraqları dalğalandı. Mənə "rusbaş" da deyə bilərsiniz. Amma ki, mən sülh tərəfdarıyam. Ruslar çəkiləndən sonra hamımız bilirik ki, Qarabağımız geri alındı".

Əvvəla, Maral Zamanova (Qocaman) bilməlidir ki, Qarabağ zəfəri Müzəffər Ali Baş Komandan, Prezident İlham Əliyevin tarixi qələbəsidir. Qarabağ Rusiyanın Azərbaycana hədiyyəsi deyil, minlərlə Vətən övladı bu torpaqların azad edilməsi üçün qan töküb, şəhid olub, əlillik qazanıb. Heç kimin bu əməyi yerə vurmağa ixtiyarı çatmır.

Maral Zamanovanın (Qocamanın) öz atası 20 Yanvar hadisəsində şəhid olsa da, o, 20 Yanvar cinayətkarlarının cəzalandırılmasını tələb edənləri "Azərbaycanın düşməni" adlandırıb və deyib ki, Norveç Nobel Komitəsinə müraciət təşkil edəcək ki, Qorbaçova qarşı olanların fikirlərinə şərik deyillər: "Bu gün siz Azərbaycanın bir nömrəli düşmənisiniz. Çünki Azərbaycanda sakitlikdir, əmin-amanlıqdır, siz gedib başlamısınız rusu qaşımağa. Nə idi fikriniz, özü də bizim adımızdan istifadə edirsiniz. Biz məktubumuzu yazacağıq, lazım olan yerdə ictimailəşdirəcəyik də. Press-konfrans çağırıb hamımız bildirəcəyik ki, bizim bu işdə əlimiz yoxdur. Niyə indi rusla düşmən olmaq istəyirsiniz?".

Həqiqətən də, 35 il gözlədikdən sonra Maral Zamanovanın məhz indi - Rusiya tərəfindən vurulmuş AZAL təyyarəsinin kompensasiyasının ödənilmədiyi, günahkarının cəzalandırılmadığı, əhalinin Moskvaya qarşı qəzəbli olduğu bir şəraitdə Rusiyanın bu cür açıq müdafiəsinə qalxması düşündürücüdür.

İnternetdə axtarış zamanı saxtakarlıq edərək hələ də özünü "20 Yanvar Şəhid Ailələrinin Hüquqlarının Təmin Olunması" İctimai Birliyinin sədri kimi təqdim edən, "reket QHT" təmsilçisi kimi tanınan Maral Zamanovanın (Qocamanın) 20 Yanvar şəhidlərinin ailə üzvlərini aldatması, onların etibarından sui-istifadə etməsi barədə xeyli materiala rast gəldik.

Azərbaycan mediasında bir müddət əvvəl yer alan "20 Yanvar iştirakçılarını şantaj edən Maral Qocaman kimdir?" adlı araşdırmada bu sətirlər diqqət çəkir: ""SSRİ sevgisi"ni gizlətməyən Maral Qocamanın xarici dairələrin əlində alət kimi istifadə edilməsi ehtimalı da diqqətlə araşdırılmalıdır".

Həmin dairələrin bir "Ай, молодец!"i üçün öz xalqının maraqlarını tapdayanlar, dönüklər üçün müqəddəs heç nə olmur.

Milli.Az