Uşağı məktəbə həvəsləndirməyin 7 sadə yolu - Valideynlər bunları bilməlidir

Yeni tədris ilinin başlaması ilə valideynləri düşündürən əsas məsələlərdən biri də uşaqların məktəbə və dərslərə marağını artırmaqdır. Xüsusilə birinci sinfə gedən uşaqlar üçün məktəb həyatı yeni mühit, yeni insanlar deməkdir. Bu səbəbdən onların məktəbə uyğunlaşması və dərsə həvəslə yanaşması üçün valideynlərin münasibəti mühüm rol oynayır.

Milli.Az xəbər verir ki, uşağı məktəbə həvəsləndirməyin ən yaxşı yollarından biri onda məktəb haqqında müsbət təsəvvür yaratmaqdır. Valideynlər məktəbi yalnız dərs, ev tapşırığı və qiymətlərlə əlaqələndirmək əvəzinə, uşağa yeni dostlar qazanacağı, maraqlı məlumatlar öyrənəcəyi və müxtəlif bacarıqlar əldə edəcəyi bir mühit kimi təqdim edə bilərlər.

Çanta, dəftər, qələm və digər məktəb ləvazimatlarının seçiminə uşağı da cəlb etmək onun məktəbə marağını artıra bilər. Öz zövqünə uyğun əşyaları seçən uşaq məktəbə hazırlıq prosesinin bir hissəsinə çevrildiyini hiss edir.

"Filankəs səndən yaxşı oxuyur" kimi ifadələr uşağın özünəinamına mənfi təsir göstərə bilər. Bunun əvəzinə onun göstərdiyi səyi və əvvəlki nəticələri ilə müqayisədə əldə etdiyi irəliləyişi qiymətləndirmək daha faydalıdır.

Uşağın yalnız yüksək qiymət aldığı zaman təriflənməsi onda uğursuzluq qorxusu yarada bilər. "Sən bunun üçün çox çalışdın", "Bu dəfə əvvəlkindən daha yaxşı alındı" kimi ifadələr uşağın öyrənməyə marağını gücləndirir.

Valideynlər hər gün uşağın məktəbdə keçirdiyi günlə maraqlanmalıdır. Lakin yalnız "Neçə aldın?" sualını vermək əvəzinə "Bu gün səni ən çox nə sevindirdi?", "Müəllimin hansı mövzudan danışdı?" və ya "Dostlarınla nə etdiniz?" kimi suallar vermək daha səmərəli ola bilər.

Uşağı dərs oxumağa məcbur etmək və dərsi cəza vasitəsinə çevirmək məktəbə qarşı mənfi münasibət formalaşdıra bilər. Dərs üçün müəyyən vaxt ayırmaq, fasilələr vermək və uşağın yaşına uyğun rejim yaratmaq daha düzgün yanaşmadır.

Əgər uşaq məktəbə getmək istəmirsə, bunun səbəbini öyrənmək vacibdir. Bəzən səbəb dərslərin çətinliyi deyil, müəllimdən çəkinmək, sinif yoldaşları ilə problem yaşamaq, uğursuzluq qorxusu və ya yeni mühitə uyğunlaşa bilməmək ola bilər.

Valideyn uşağı danlamaq əvəzinə onun hisslərini dinləməli və problemin həllində yanında olduğunu göstərməlidir.

Unutmaq olmaz ki, hər uşağın məktəbə uyğunlaşma müddəti eyni deyil. Bəzi uşaqlar yeni mühitə tez alışdığı halda, digərlərinə daha çox vaxt və dəstək lazım olur. Səbirli münasibət, düzgün ünsiyyət və uşağın səylərinin qiymətləndirilməsi onun məktəbə daha müsbət yanaşmasına kömək edə bilər.

Əsas məqsəd uşağı yalnız yaxşı qiymət almağa deyil, öyrənməkdən zövq almağa həvəsləndirməkdir.

Müəllif: Nərmin Mahmudova (Milli.Az müxbir)