Mayot adası Fransanın müstəmləkə siyasətinə qarşı savaşmağa çalışır

Qəmər adaları müstəqil olduğu zaman onun 4 adası da müstəqil olmalıdır. Bununla bağlı BMT qərarı mövcuddur. Həmin qərar qəbul edilsə də, həyata keçirilməyib. Bunun da bir səbəbi var. O da Fransanın müstəmləkəçilik siyasətidir.

Milli.Az bildirir ki, bunu Trend-ə açıqlamasında Mahore komitəsinin üzvü Mahmud Muidin deyib.

O qeyd edib ki, Mayot adası hazırda Fransanın müstəmləkə siyasətinə qarşı savaşmağa çalışır.

"Amma hələlik bir nəticə yoxdur. Biz Azərbaycandan dəstək aldıq. Həmçinin, Azərbaycan Prezidenti İlham Əliyevə təşəkkür edirəm ki, o, Mayot adası haqqında danışıb. Fransa burada mədəni bir divar hörüb. Çünki etnik və bioloji olaraq biz Mayot adasından olanlar, digər ada sakinləri ilə eyniyik. Amma Fransa bunun davam etməsini istəmir. Biz Fransanın bu siyasətini pisləyirik", - deyə o bildirib.

Qeyd edək ki, Bakıda Bakı Təşəbbüs Qrupunun təşkilatçılığı ilə Fransanın işğalı altında olan Mayot adasına həsr olunmuş beynəlxalq konfrans keçirilir.

"Qəmər Adaları İttifaqının Mayot adasının Fransa tərəfindən qeyri-qanuni işğalı" adlı konfransda Fransanın işğalına qarşı mübarizə aparan və Mayot adasının Qəmər Adaları İttifaqının (Komor Adaları İttifaqı - red.) tərkibinə geri qayıtmasına çalışan Qəmər Adaları İttifaqı, o cümlədən, Mayot adasının ictimai-siyasi xadimləri, elmi dairələrinin nümayəndələri, hüquq müdafiəçiləri, qeyri-hökumət təşkilatlarının rəhbərləri, siyasi partiyalarının üzvləri, habelə Azərbaycanda akkreditə olunmuş diplomatik korpusun nümayəndələri iştirak edir.

Konfransda Qəmər Adalarında Fransanın müstəmləkəçilik tarixi, Mayotun Fransa tərəfindən işğalı və bunun nəticəsində qəmərlilərə vurulmuş ziyan, Fransanın bu bölgədə müstəmləkəçilik siyasətinin geosiyasi və iqtisadi maraqları, habelə Qəmər Adaları İttifaqının Mayot adası ilə bağlı beynəlxalq təşkilatların mövqeyi müzakirə olunur.

Milli.Az
Xəbərlərimizi WhatsApp kanalımızdan da oxuyun