Siyasət

Azərbaycanın keçdiyi inkişaf yolu bir çoxları üçün nümunədir - Sevil Mikayılova

24 Aprel 2024 15:55
Baxış: 400

ADA Universitetində "COP29 və Azərbaycan üçün Yaşıl Baxış" mövzusunda beynəlxalq forumda Prezident İlham Əliyev bu gün dünyanı, xüsusən bölgəmizi narahat edən bir sıra məsələlərlə bağlı Azərbaycanın mövqeyini bildirdi. Təxminən 4 saata yaxın davam edən çıxışında Azərbaycan Prezidenti növbəti dəfə beynəlxalq ictimaiyyətə regiondakı vəziyyət və dünyada baş verən proseslərin regiona təsirləri barədə dolğun məlumatlar verdi.

Milli.Az xəbər verir ki, bunu Trend-ə açıqlamasında Milli Məclisin deputatı Sevil Mikayılova deyib.

O bildirib ki, Azərbaycanın qazandığı uğurlar bütün dünyanı heyrətləndirir, bu nailiyyətlərin əsasında duran amillər geniş təhlil olunur.

"Azərbaycanın keçdiyi inkişaf yolu, beynəlxalq aləmdə qazandığı nüfuz, yürütdüyü müstəqil xarici siyasət, ədalətli mövqeyi bir çoxları üçün nümunədir. Təqdirəlayiqdir ki, ölkənin iqtisadi müstəqilliyi sadalanan uğurlara aparan yolun əsasını təmin edib.

Ötən illər ərzində Azərbaycan dövləti neft gəlirlərindən rasional istifadə etməklə davamlı iqtisadiyyat qurmağı bacarıb. Neft və qaz gəlirləri işsizlik və yoxsulluq məsələlərinin həlli üçün istifadə edilib. Ölkədə dayanıqlı inkişaf əldə olunub. Zamanında atılan dəqiq addımların nəticəsi olaraq bu gün Azərbaycan iqtisadiyyatı böhran vəziyyətində də sabit artım göstərə bilir".

Deputat əlavə edib ki, iqtisadi sahədə əldə edilən uğurlar digər sahələrdə inkişafa müsbət təsirlərini göstərə bilib.

"Azərbaycan öz hərbi-siyasi gücü hesabına uzun illər işğal altında olan torpaqlarını azad edib və ədaləti öz gücü ilə bərpa edib. Hazırda gündəlikdə duran əsas məsələ Azərbaycan və Ermənistan arasında sülh müqaviləsinin imzalanmasıdır və təqdirəlayiq haldır ki, bu istiqamətdə baza prinsiplərinin razılaşdırılması tam real görünür".

S.Mikayılova vurğulayıb ki, Azərbaycanın qazandığı uğurları heç bir halda qəbul etmık istəməyən qüvvələr hazırda ölkəmizə qarşı qərəzli mövqe tuturlar.

"Bəzi ölkələrdən Azərbaycana qarşı əsassız hücumların şahidi oluruq. Həmin ölkələr faktiki olaraq Azərbaycana qarşı soyuq müharibə aparırlar. Təbii ki, Azərbaycan dövləti təhdidləri görür və cavab tədbirləri də gecikmir. Bu isə aydın şəkildə göstərir ki, heç bir qüvvə Azərbaycanla təzyiq dilində danışa bilməz.

Bu gün Azərbaycan regionun lider dövləti kimi həm regional, həm də qlobal problemlərin həllinə öz töhfəsini verir. COP29-un Azərbaycanda keçirilməsi də aparılan sistemli fəaliyyətin nəticəsidir. Azərbaycan dünyanın yaşıl gündəliyini aktiv təşviq edən ölkələrdən birinə çevrilib. COP29 təxirəsalınmaz məsələlərin həllinə qlobal aləmdə töhfə vermək baxımından Azərbaycan üçün xüsusi imkanlar yaradır. Bu tədbir, eyni zamanda, region dövlətlərinin birgə əməkdaşlığının qurulması və inkişaf etdirilməsi üçün unikal fürsət olacaq".

Milli.Az
Xəbərlərimizi WhatsApp kanalımızdan da oxuyun

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.