30 NATO ölkəsindən Ukraynaya DƏSTƏK

NATO-ya üzv olan 30 ölkənin hamısı Ukraynanın hərbi-siyasi bloka qoşulmasının zəruriliyində həmfikirdir.

Bu barədə dekabrın 1-i Kiyev Təhlükəsizlik Forumunda çıxışı zamanı Ukraynanın baş nazirinin Avropa və Avro-Atlantik inteqrasiya üzrə müavini Olqa Stefanişina bildirib.

Stefanişinanın sözlərinə görə, NATO-ya üzv olan bütün ölkələr Ukraynaya qapıların açıq olduğunu təsdiqləyib.

"Alyansa üzv olan ölkələrin heç biri Ukraynaya "yox" cavabını verməyib. Əslində, bu gün bütün 30 NATO ölkəsi Ukraynanın müraciətinə rəsmi baxılacağını təsdiqləyib. Buxarest görüşündən sonra artıq bu artıq NATO-nun rəsmi mövqeyidir. (NATO üzv ölkələrin xarici işlər nazirlərinin 30 noyabr Rumıniyanın paytaxtında görüşü)"-deyə Olqa Stefanişina bildirib.
"İndi Kiyev üçün əsas prioritet Alyansın 2023-cü ilin iyulunda keçiriləcək sammiti çərçivəsində bu qərarı reallaşdırmaqdır"-deyə xanım Stefanişina vurğulayıb.
Olqa Stefanişina onu da əlavə edib ki, hazırda dünyada təhlükəsizlik məsələləri kontekstində Şimali Atlantika Alyansına alternativ yoxdur.
Onun sözlərinə görə, Ukraynanın üzvlüyə qəbul edilməsi xahişi ilə NATO-ya müraciət etmək qərarı Rusiya ilə müharibədə qalib gəlmək üçün deyil, bu qərar ümumilikdə ölkənin təhlükəsiz gələcəyi naminə verilib.

"Bu, müharibədən sonrakı dövr üçün strateji qərardır" -deyə Olqa Stefanişina bildirib.

Stefanişina eyni zamanda müttəfiqlərin bu gün Ukraynaya verilə biləcək hərbi sursatları olmadığını bildirib.

"Bununla belə, NATO Rusiya üçün böyük bir tətik olaraq qalır"- deyə xanım Stefanişina sözlərini yekunlaşdırıb.

Xatırladaq ki, Macarıstan 2017-ci ildən Ukraynanın NATO iclaslarında iştirakını əngəlləyir. Bu səbəbdən Ukraynanın xarici işlər naziri Dmitri Kuleba Alyansın Buxarestdə keçirilən toplantısında rəsmi sessiyada iştirak edə bilməyib.

Macarıstanın xarici işlər naziri Peter Szijarto, öz növbəsində, Budapeştin Transkarpatiyadakı diasporla problemi həll olunmadığına görə, Ukraynanı NATO-da bloklamaqda davam edəcəyini vurğulayıb.

Milli.Az