Siyasət

Ermənistanın son tələbi də ƏLİNDƏN ALINIR - Moskvanın PLANI NƏDİR?

25 May 2022 14:00
Baxış: 2 558

"Brüssel görüşləri Moskva yaxud Soçidəki Qarabağ gündəminin təkrarıdır".

Bunu Milli.Az-a açıqlamasında Rusiya Xalqlar Dostluğu Universitetinin dosenti, siyasi jurnalist Anar Həsənov deyib.

O bildirib ki, Azərbaycan istədiyinə nail olmağa çox yaxındır:

"Deməliyəm ki, hələlik həm Moskva, həm də Brüssel görüşləri daha çox məşvərət xarakterlidir. Brüssel siyasi meydanın autsayderi olan Minsk Qrupunu əvəz edir, o "toy general"ından başqa bir şey deyil. Bu baxımdan Brüssel görüşündə səslənən yanaşmaların xoşagəlimliyi ilə ümidlənməməliyik. Brüssel Qarabağ ermənilərini subyekt kimi görmək istəyir. Bu işdə gələcəkdə Haaqa məhkəməsinə qədər qondarma müraciətlər edə bilər. Ona görə də statusun müzakirəsi məsələsində israrlıdır.

Brüssel qanunla idarə edilən mərkəz olsa da, onun Azərbaycana olan münasibəti Asiya dövləti münasibətidir. İrəvana olan münasibət isə qohum sivilizasiya maraqlarından irəli gəlir. Odur ki, Şarl Mişelin ismarıcları və prioritetləri xoşagələn o halda ola bilər ki, Brüssel açıq şəkildə Qarabağdakı qanunsuz, hərbi birləşmələrin tərksilah edilməsini tələb etsin. Bu təkliflə nə Moskva, nə də Brüssel çıxış edir. Yerdə qalan müddəalar "köhnə havalardır". Özünüz bir düşünün, əgər delimitasiya prosesi Moskvanın hərbi xəritələri üzərindən həyata keçiriləcəksə, Brüsselin nəsə təklif etməyi ikinci dərəcəli deyilmi!?

Brüsselin və Moskvanın açıq demədiyi müddəa odur ki, hər iki tərəf Qarabağın Azərbaycanın tərkib hissəsi olduğunu artıq qəbul edib, Azərbaycan onları faktla üzbəüz qoyub. İndi əsas məqsəd hər iki qütb üçün erməni əhalisinin subyektliyini qorumaq, yəni Azərbaycan daxilində onlara özünüidarəni təmin etmək və ən pis halda bu subyektliyin itirilməsini Azərbaycana baha qiymətə "satmaqdır". Bu işdə hər iki qütbün marağı İrəvanın marağı ilə üst-üstə düşür. Ona görə Moskvanı Avropanın Qarabağ kontenti ilə məşğulluğu qane edir, prosesə mane olmur.

Bu arada Zəngəzur dəhlizi mövzusunu Azərbaycan qəsdən gündəmdə saxlayır ki, Ermənistan "Qarabağ ermənilərinin subyektivliyi" məsələsindən imtina etsin. Hər görüşdən sonra nəqliyyat yolları ilə bağlı tərəflərin ziddiyyətli yanaşmasının kökündə də bu dayanır. Demək ki, Azərbaycan Ermənistanın ən zəif yerinə sıxmaqla istədiyinə nail olmaq istəyir. Açığı, İrəvan nəinki divara dirənib, divar artıq qurtarıb, deyərdim.

İrəvanda yay ayında növbəti Dəmir yumruğu alacaqlarını gözləyirlər. Ona görə mövqeləri dəyişkən və bulanıqdır. Amma bir addım qabağa, iki addım geriyə manevri üçün yer qalmayıb".

Təhməz Əsədov
Milli.Az

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics