Siyasət

Paşinyan Azərbaycanı aldatdı? - Ermənistan üçün "ölüm zəngi" ÇALINIR

19 May 2022 14:17
Baxış: 4 122

"Ermənistanın hazırda mövcud hərbi potensialı döyüş əməliyyatları və ya müharibəni aparmaq üçün yetərli deyil". 

Bunu Milli.Az-a açıqlamasında hərbi ekspert Ədalət Verdiyev deyib.

O bildirib ki, birgə bəyanatın yerinə yetirilməsi üçün təzyiqlərimizi davam etdirməliyik:

"Bu gün Ermənistanın hərbi potensialının döyüş əməliyyatları üçün kifayət etməməsi, onlar tərəfindən törədilən lokal təxribatları və atəşkəs pozuntularını istisna etmir. Ayrı-ayrı istiqamətlərdə daha təsirli, effektiv təxribatlara əl atmaq Ermənistanın daim planlarının bir hissəsi olub və bu, indi də belədir.

Düşünmürəm ki, biz uzun müddət bu proseslərə səbrli və təmkinli şəkildə yanaşaq. Əgər təxribatların miqyası Azərbaycanı artıq dərəcədə narahat edərsə, Azərbaycan mütləq buna əvvəllər olduğu kimi daha adekvat, daha təsirli və səmərəli şəkildə cavab verəcək. 

Mənim təklifim isə, atəşkəs pozulan mövqelərin harada və ya necə yerləşməsindən asılı olmayaraq dərhal darmadağın edilməsi və Azərbaycan bayrağının orada qaldırılmasından ibarətdir. Ermənilərə bu güc metodu daha tez təsir edir, nəyinki bəyanat, xəbərdarlıq və s.

İstənilən halda Azərbaycan proseslərdə öz hərbi, siyasi, diplomatik üstünlüyündən istifadəsini gələcəkdə də davam etdirəcəyini şübhə doğurmur.

Paşinyan son bir ayda iki dəfə işçi qrupunun görüşünün vaxtını uzatması hesab edirəm ki, Ermənistanda baş verən bu daxili proseslərlə, müxalifətin təzyiqi ilə də bağlı ola bilər. Amma bu, Azərbaycanı maraqlandırmamalıdır.

Ortada birgə bəyanat var, birgə bəyanatın yerinə yetirilməsi üçün təzyiqlərimizi davam etdirməliyik. Əgər biz bu məsələdə Ermənistana bir qədər də zaman versək, onlar seçki, mitinq, etiraz aksiyaları bəhanəsi ilə prosesləri daha uzun bir müddətə ləngidə bilərlər. Odur ki, biz bunu düşünməyəcəyik.

Əgər Ermənistan sərhədlərin delimitasiyası prosesindən yayınırsa, biz bunu birtərəfli qaydada yerinə yetirməyə başlamalıyıq. Gözləməyək ki, Ermənistan nə zaman öz nümayəndəsini göndərəcək".

Təhməz Əsədov
Milli.Az

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics