Bıçağın ucunda əlavə edin bəsdir, mürəbbəniz şəkərlənməyəcək

Evdə hazırlanan mürəbbənin bir neçə aydan sonra qatılaşıb şəkər kristalları ilə örtülməsi tez-tez rast gəlinən problemdir. Bəzən mürəbbə o qədər bərkiyir ki, qaşıqla götürmək belə çətinləşir.

Milli.Az lent.az-a istinadən bildirir ki, bir çoxları bunun mürəbbənin həddindən artıq bişirilməsi ilə bağlı olduğunu düşünür. Lakin əsas səbəblərdən biri şəkərin soyuduqdan sonra kristallaşmasıdır. Bunun qarşısını almağın sadə üsullarından biri mürəbbəyə çox az miqdarda limon turşusu əlavə etməkdir. Şəkər isti mayedə həll olsa da, mürəbbə soyuduqca saxaroza yenidən kristallar əmələ gətirməyə meyllidir. Şərbətdə şəkərin miqdarı həddindən artıq çox olduqda və ya tam həll olunmamış şəkər dənəcikləri qaldıqda bu proses daha da sürətlənə bilər. Nəticədə əvvəlcə duru olan şərbət zaman keçdikcə qatılaşır və şəkərlənir.

Limon turşusu isə bu prosesin qarşısını almağa kömək edə bilər. Turş mühit və yüksək temperaturun təsiri ilə saxarozanın bir hissəsi qlükoza və fruktozaya parçalanır. Bu şəkərlər saxarozadan fərqli xüsusiyyətlərə malik olduğundan kristallaşmanın qarşısının alınmasına kömək edir. Nəticədə mürəbbənin şərbəti daha uzun müddət duru qala bilər.

Limon turşusunu bişirmənin sonunda, ocağı söndürməzdən təxminən 2-3 dəqiqə əvvəl əlavə etmək məsləhətdir. Tozu birbaşa qaynayan mürəbbəyə tökmək əvəzinə, əvvəlcə bir qaşıq isti şərbətdə həll edib daha sonra mürəbbəyə qarışdırmaq olar. Miqdara da diqqət etmək vacibdir. Bir kiloqram şəkərə təxminən 0,5-1 qram limon turşusu kifayət edir. Bu, təxminən dörddə bir çay qaşığına uyğun gəlir. Həddindən artıq limon turşusu əlavə etmək mürəbbənin dadını dəyişə bilər. Mürəbbənin şəkərlənməsinin qarşısını almaq üçün yalnız limon turşusuna güvənmək olmaz. Meyvə ilə şəkərin düzgün nisbətdə istifadə edilməsi, şəkərin yaxşı həll olunması və mürəbbənin həddindən artıq uzun müddət qaynadılmaması da vacibdir. Hazır mürəbbəni sərin, qaranlıq və temperaturun tez-tez dəyişmədiyi yerdə saxlamaq məsləhətdir. Düzgün hazırlanıb saxlanıldıqda mürəbbənin həm dadını, həm də şərbətinin normal quruluşunu daha uzun müddət qorumaq mümkündür.

Müəllif: Tural Hüseyn (Milli.Az redaktor)