Kulinariya

Sobada gül kələmi: Dilim-dilim, xırçıldayan ləzzət

19 Yanvar 2026 00:21

Baxış: 1 385

VTB-də minimal faiz dərəcəsi ilə nağd kredit 9.9%-dən

#KULİNARİYA

Gül kələmini qızartmadan, çox yağ çəkmədən və ağır qoxusunu duymadan hazırlamağın ən yaxşı yolu budur. Xüsusi hazırlanan qatıqlı sous kələmlərin üzərini bir örtük kimi sarıyaraq, sobada möhtəşəm bir qızılı rəng almasını təmin edir.

Milli.Az lazım olan inqrediyentlər və hazırlanma qaydasını təqdim edir:

Lazım olanlar
1 ədəd orta boy gül kələmi.

Sous üçün:

3-4 xörək qaşığı qatıq.

2 ədəd yumurta.

Yarım armudu stəkan duru yağ (zeytun yağı olsa daha yaxşıdır).

2 xörək qaşığı un (daha xırtıldayan olması üçün bir az qarğıdalı unu da əlavə edə bilərsiniz).

Duz, istiot, pul bibər və ən vacibi - rəng verməsi üçün sarıkök (və ya şirin bibər tozu).

İstəyə görə 2 diş əzilmiş sarımsaq.

Hazırlanma qaydası
Gül kələmini yarpaqlarından təmizləyin və ağac formalı hissələrini bir-birindən ayırın. Çox böyük olanları ortadan bölün ki, hər tərəfi bərabər bişsin.

Geniş bir qabda qatıq, yumurta, yağ, un və bütün ədviyyatları mikser və ya çəngəllə yaxşıca qarışdırın. Sous keks xəmiri qatılığında olmalıdır.

Gül kələmlərini bu sousun içinə atın və hər tərəfinin sousla tam örtüldüyünə əmin olun.

Soba listinə yağlı kağız sərin və kələmləri bir-birinin üstünə çıxmayacaq şəkildə düzün. Əvvəlcədən 200 dərəcə qızdırılmış sobada üzərləri qızarana qədər (təxminən 25-30 dəqiqə) bişirin.

Mükəmməl nəticə üçün tövsiyələr:
Bu reseptdə kələmləri əvvəlcədən suda qaynatmağa ehtiyac yoxdur. Sousun içindəki yağ və qatıq kələmi öz buxarı ilə bişirəcək və daha vitaminli qalacaq.

Sobadan çıxan isti gül kələmlərini yanında sarımsaqlı qatıq və ya acılı tomat sousu ilə servis edə bilərsiniz.

Lalə Qüdrətova
Milli.Az