Maraqlı

Yeni binalara görə şəhər UNESCO siyahısından çıxarıldı

22 İyul 2021 15:10
Baxış: 1 132
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

UNESCO İngiltərənin Liverpul şəhərini özünün dünya irsi siyahısından çıxarıb.

Milli.Az Reuters-ə istinadən xəbər verir ki, qərarda deyilir ki, yeni tikilmiş binalar Viktoriya dövrü dəniz körpülərinin cəzibədarlığına xələl gətirib. Beləliklə, Liverpul UNESCO-nun bu mötəbər sıyahısından çıxarılan üçüncü məkan olub. Liverpul BMT-nin mədəniyyət agentliyinin mədəni irs siyahısına 2004-cü ildə salınmışdı və beləliklə Böyük Çin səddi, Tac Mahal və Pizanın əyri qülləsi ilə bir sırada dururdu. Çində keçirilən səsvermədən sonra Dünya İrsi Komitəsi bildirib ki, yeni binlar Liverpulun "unikallıq və bütövlüyünün" üstündən xətt çəkib.

Məşhur Beatles qrupunun doğma şəhəri olan Liverpool mədəni irs siyahısına 18-19-cu əsrlərdə dünyanın ən mühüm portu, həm də əsrarəngiz memarlığı olan şəhər kimi daxil edilmişdi. Liverpulun meri Coan Anderson deyib ki, şəhərin siyahıdan çıxarılması barədə qərar "heç cür başa düşülmür", çünki UNESCO rəsmiləri bu şəhərə on il əvvəl baş çəkmişdilər. Mer deyib ki, şəhər hakimiyyəti Liverpulun ecazkar memarlığının saxlanmasına milyonlarla funt sterlinq xərcləyib. Bundan əvvəl 2007-ci ildə Omandakı təbiət guşəsi siyahıdan çıxarılmışdı. Buna səbəb brakonyerlik nəticəsində təbiətin tamamilə korlanması idi. UNESCO 2009-cu ildə öz siyahısından Almaniyadakı Elb vadisini çıxarmışdı. Bu, vadidə dördzolaqlı körpünün tikintisinə görə baş vermişdi. Hər hansı yerin irs siyahısında olması o deməkdir ki, həmin məkanlara sahib ölkələr BMT-nin konservasiya fondundan vəsait ala bilirlər. Liverpula siyahıdan çıxarıla biləcəyinə dair xəbərdarlıq 2012-ci ildə verilmişdi. O vaxt şəhərin üfüq xəttini dəyişəcək çaykənarı mənzillərin tikintisi planlaşdırılırdı. Lakin belə görünür ki, UNESCO üçün səbr kasasını daşıran son hadisə Everton komandası üçün yeni stadionun tikintisi olub. Stadionu qədim port körpülərinin bir hissəsini dağıtmaqla tikiblər.

Kamran Seyidov
Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.