Dua etmək üçün ən yaxşı məkanlar

Qurani-Kərimdən və hədislərimizdən belə qənaətə gəlmək olur ki, hər bir əməlin ədəb qaydaları olduğu kimi, dua etməyin də özünəməxsus qaydaları və şəraitləri vardır. Hər kim ona əməl edərək dua edərsə, duası daha tez qəbul olar.

Milli.Az deyerler.org-a istinadən bildirir ki, bu qaydalardan biri də duanın edildiyi məkana aiddir. Dünyada elə məkanlar vardır ki, hər kim orada dua edərsə, duası qəbul olunar. Bu məkanları tanıyaq:

1. Məscid. İmam Sadiq (ə) buyurur: "Nə zaman atamın hacəti olsaydı, onu zöhr zamanı istəyərdi. Əvvəl sədəqə verərdi, bir qədər ətir vurardı və sonra məscidə tərəf gedərdi. Orada hacətini Allahdan istəyərdi".

2. Məkkə. "Və (yadınıza salın) o zaman(ı) ki, Biz bu Evi (əzəmətli Kə'bəni) insanların dönüş yeri və əmin-amanlıq məkanı etdik və (dedik): "İbrahim məqamından (onun arxasından, ya sağ və ya sol tərəfindən) namaz üçün bir yer seçin. Və İbrahim ilə İsmailə tapşırdıq ki, Mənim evimi təvaf edənlər, yaxınlıqda olanlar (yaxud ibadətə çəkilənlər), rüku və səcdə edənlər üçün pak-pakizə edin". ("Bəqərə" 125).

Duanın qəbul olduğu müqəddəs məkanlardan biri də məhz Kəbə evidir.

3. İmam Hüseynin (ə) hərəmi. Hədislərimiz buyurur ki, hər kim İmam Hüseynin (ə) hərəmində dua edərsə, həmin dua geri qayıtmaz, səmaya qalxar və Allah onu yerinə yetirər.

4. Həzrət Peyğəmbərin (s) müqəddəs məzarının yanında. İmam Sadiq (ə) buyurur: "Nə zaman Peyğəmbərin (s) qəbrinin yanında etdiyin dua sona çatarsa, bu əməlləri yerinə yetir: Həzrətin (s) minbərinə tərəf gəl və onu məsh et və gözlərinə çək. Peyğəmbərin (s) qəbri yanında Allahı həmd et və hacətini istə".

Həzrət Peyğəmbər (s) buyurur: "Mənim minbərim ilə evim arasında behişt bağları vardır". Ona görə də həmin məkan - duanın qəbul olduğu məkanlardan biridir.

5. Kufə məscidi. İmam Sadiq (ə) buyurur ki, Kufə məscidi elə məkandır ki, minlərlə peyğəmbər və vəsilər orada namaz qılmışdır.

Çox sayda din alimləri burada ibadət etmişdir. Bu ibadətlərin təsirindəndir ki, edilən dualar qəbul olar.

Təbərrük üçün duanın yerinə yetirilməsinin, daxili halətlə əlaqəsinə toxunaq.

İmam Həsən Müctəba (ə) buyurur: "O kəsin ki, qəlbinə Allah rizasından başqası daxil olmaz, əgər dua edərsə, mən zaminəm ki, duası yerinə yetəcəkdir".

Milli.Az