Altıgünlük iş həftəsinin iqtisadi effekti açıqlandı

Altıgünlük iş həftəsi adambaşına düşən ÜDM-in davamlı artımını təmin etmir.

Milli.Az xəbər verir ki, bu barədə "BKS Mir investisii" şirkətinin fond bazarı üzrə eksperti Lyudmila Rokotyanskaya "gazeta"ya açıqlamasında bildirib.

Onun sözlərinə görə, altıgünlük iş rejimi uzunmüddətli dövrdə səmərəli hesab olunmur. Rokotyanskaya xatırladıb ki, bir sıra digər ölkələr bu sistemdən humanist səbəblərə görə yox, effektivliyini itirdiyi üçün imtina ediblər. Ekspert qeyd edib ki, tarix boyu insanlıq səmərəsiz olan əmək formalarından mərhələli şəkildə uzaqlaşıb.

Rokotyanskaya beşgünlük iş həftəsinə keçidin müsbət nəticələrini də vurğulayıb. Onun sözlərinə görə, Henri Fordun təcrübəsi göstərib ki, əlavə istirahət günləri işçilərin alış-verişə daha çox vaxt ayırmasına səbəb olur və bu da ümumi istehlak tələbatını artıraraq iqtisadiyyata dəstək verir.

Ekspert bildirib ki, altıgünlük iş həftəsi uzun müddətdə məhsuldarlığın azalmasına gətirib çıxara bilər. Yorğunluq, işdə tükənmişlik, sağlamlıq problemləri, diqqət və yaradıcılıq qabiliyyətinin zəifləməsi bu sistemin əsas riskləri sırasındadır. Bəzi sahələrdə isə istehsalat xəsarətlərinin artması mümkündür.

Müasir tədqiqatlar iqtisadi artımın əsas mənbəyinin işlənən saatların sayı olmadığını göstərir. Rokotyanskayanın fikrincə, əsas amillər məhsuldarlıq, texnologiya, yaradıcılıq və idarəetmə keyfiyyətidir.

Bununla yanaşı, ekspert qısa müddətli istisnaları da qeyd edib. Onun sözlərinə görə, ucuz işçi qüvvəsinin çox olduğu, avtomatlaşdırmanın zəif inkişaf etdiyi və sadə əməliyyatlara əsaslanan sahələrdə altıgünlük iş həftəsi müvəqqəti müsbət nəticə verə bilər. Həmçinin bəzi startaplarda və səfərbərlik iqtisadiyyatı şəraitində bu modeldən istifadə olunur.

Mütəxəssislər isə hesab edir ki, uzunmüddətli iqtisadi inkişaf üçün əsas yol iş vaxtının artırılması yox, əmək səmərəliliyinin yüksəldilməsidir.

İsmayıl
Milli.Az