Düz bağırsaq sallanmasının səbəbləri: qəbizlik, ağır doğuşlar...

Düz bağırsaq sallanması hər yaşda rast gəlinən problemdir. Problemə daha çox qadınlarda təsadüf olunduğu bildirilir. Səbəb kimi isə çox zaman qəbizlik, doğuşlar, doğuşun travmalı olması göstərilir.

Milli.Az e-tibb.az-a istinadən düz bağırsaq sallanması- rektosel barədə ümumi cərrah, proktoloq Ellada Manafovanın fikirlərini təqdim edir:  

Rektosel yoğun bağırsağın son hissəsinin uşaqlıq yoluna doğru şişməsidir. Bu zaman rektumun divarı şişkinləşib uşaqlıq yoluna doğru şişərək böyüyür, bağırsağın divarı nazikləşir, şişkinlik səbəbli divertikula yarana bilir. Divertikula bağırsağın hərəkəti zamanı aşağı doğru sallana bilir.

Rektoselin əmələ gəlməsinə aşağıdakılar səbəb ola bilir:

* rektal nahiyənin patoloji dəyişiklikləri

* rektal hissənin qabaq əzələlərinin arxa tərəf əzələlərinin üstünə çıxması

* kiçik çanaq orqanlarının əzələsinin anadangəlmə zəif inkişafı

* xroniki qəbizlik və düz bağırsağın disfunksiyası

* anal dəliyin funksiyasının pozulması

* yaşla əlaqədar disfunksiya və kiçik çanaq əzələlərinin rektal bölgəsinin atrofiyası

* qadın cinsi orqanlarının xəstəlikləri

Rektoselin əmələ gəlməsində polietioloji xəstəliklərin də rolu böyükdür. Xroniki daxili təzyiqin olması, müxtəlif travmalar, rektovaginal hissənin zəifləməsi də xəstəliyin inkişaf etməsində mühüm rol oynayır. Qadınlarda xəstəliyin inkişaf etməsinə qadınların ağır doğuş keçirmələri və iri uşaq dünyaya gətirmələri səbəb olur. Bu xəstəliyi olan qadınlar xəstəliyin ilkin simptomlarının doğuşdan sonra meydana çıxdığını qeyd edirlər. Xəstəlikdən əziyyət çəkənlərin 83% xroniki qəbizlikdən, 15% isə ağır fiziki işlə işləyənlərdən ibarət olur.

Xəstələrin 18%-də perkosel histerektamiyadan əziyyət çəkir. 63% qadınlarda isə rektoselin əmələ gəlməsində aşağıda sadalanan faktorlardan ən azı ikisi müşayiət edilir:

*Ağır doğuşlar zamanı düz bağırsaq-uşaqlıq yolunun doğum travmaları nəticəsində cırılması.

* Doğuş zamanı mamaçanın sərt manipulyasiyası.

* Təkrar doğuşlar.

Bu səbəblər kiçik çanaq əzələlərinin zəifləməsinə, rektoselin əmələ gəlməsinə səbəb olur.

Düz bağırsağın ön əzələlərinin arxa əzələlinin üstünə çıxması kiçik çanağın əzələsinin zəifləməsi səbəbli baş verən rektovaginal arakəsmənin şişməsinə səbəb olur. Bu zaman cinsi əlaqə zamanı düz bağırsaq hərəkətli olur. Rektosel təkcə düz bağırsağın anatomik quruluşunun çatışmazlığı ilə əlaqədar olmur. Bu, düz bağırsaq öz funksiyasını düzgün yerinə yetirmədikdə də baş verir.

Milli.Az