Sınamadığı üsul qalmamışdı - Bir ildə 32 kilo arıqladan 3 addım - FOTO

Nikki Madoç uzun müddət müxtəlif pəhrizlər və idman proqramları sınasa da, qalıcı bir nəticə əldə edə bilmirdi. Lakin sonda mənimsədiyi yeni həyat tərzi sayəsində 32 kilodan çox arıqlamağı bacardı. Bu gün o, həm qidalanma koçu kimi fəaliyyət göstərir, həm də sosial mediada təcrübələrini paylaşaraq minlərlə insana ilham verir.

Milli.Az xəbər verir ki, Nikki uşaqlıqdan bəri çəki problemi ilə mübarizə apardığını və stresli olduğu zamanlarda həddindən çox yemək yediyini deyir. O, bu dəfə fərqli bir yol seçir.

Arıqlamağa başlayanda istəməsə də, öz şəkillərini çəkir və hər gün nə yediyini, nə qədər hərəkət etdiyini qeyd edir.

Keçmişdə qarşısına "20 kilo arıqlayacam" kimi böyük hədəflər qoyub ruhdan düşən Nikki, bu dəfə sadəcə "hər öyünümü 30 gün boyunca izləyəcəm" deyərək kiçik hədəflərlə başlayır.

Hər ay hədəfinə çatanda özünə yeməklə əlaqəsi olmayan hədiyyələr (məsələn, ayaq masajı aparatı, saç boyama və s.) alaraq motivasiyasını yüksək tutur.

Qidalanma vərdişlərini dəyişmək
Nikki əvvəlcə nə qədər çox yediyini fərq edəndə şoka düşdü. O, pəhrizini tamamilə yeniləyir.

Əvvəllər bir öyündə normaldan 3 qat çox yediyini anlayır və porsiyalarını kiçildir.

Zülallara (protein), meyvə və tərəvəzlərə üstünlük verir. Sevimli yeməklərini daha sağlam versiyada hazırlamağı öyrənir.

Arada özünə sevdiyi "təhlükəli" yeməklərdən yeməyə icazə verir, lakin dərhal sonra rejiminə qayıdır. Beləcə, günahkarlıq hissindən xilas olur.

Sevimli idman növünü tapmaq
Nikki əvvəllər özünü nifrət etdiyi idman növlərinə (məsələn, qaçış) məcbur edirdi. Bu dəfə isə yanaşmasını dəyişdi:

O, konki sürməyə (paten) başladı. Bu, onun üçün məcburi məşq deyil, sevimli hobbiyə çevrildi.

İlk 15 kilonu yalnız qidalanma ilə verdikdən sonra ağırlıq qaldırmağa və buz üstündə konki sürməyə başladı. Bu, bədəninin daha sıx və formalı görünməsini təmin etdi.

Nikkinin məsləhəti: "Əsas məsələ sabitlikdir. Hər şeyi bir anda dəyişib özünüzü yormayın. Kiçik dəyişikliklərlə başlayın. Bir gün rejimdən çıxsanız belə, təslim olmayın və növbəti gün davam edin. Nəticəyə deyil, vərdişlərinizə sadiq qalmağa fokuslanın."

Lalə Qüdrətova
Milli.Az