Dondurulmuş qidaları zərərsiz və sürətli açmaq üçün 5 qayda

Dondurulmuş qidaların buzunu açarkən soyuducu, soyuq su və ya mikrodalğalı soba kimi doğru üsullara üstünlük verilməlidir. Otaq temperaturunda buz açmaq bakteriyaların sürətlə çoxalmasına səbəb olduğu üçün tövsiyə edilmir. Sağlamlıq baxımından ən vacib məqam isə buzu açılmış qidanı heç vaxt yenidən dondurmamaq və qısa müddətdə bişirməkdir.

Milli.Az xəbər verir ki, soyuducunun aşağı gözü ən təhlükəsiz üsul hesab olunur. Qida soyuducunun daxilində (aşağı rəflərdə) açıldığı üçün bakteriyaların çoxala biləcəyi temperatur həddinə çatmır. Xüsusilə ət, toyuq və balıq üçün bu üsul mütləqdir. Proses vaxt aparsa da, qidanın teksturası və dadı mükəmməl qorunur. Çirklənmənin qarşısını almaq üçün qidanı sızdırmaz bir qabda saxlamaq lazımdır.

Təcili hallarda dondurulmuş qidanı ağzı bağlı paketdə soyuq su dolu bir qaba qoyaraq buzu daha tez aça bilərsiniz. Suyun soyuq olması bakteriya yaranmasının qarşısını alır. Suyu hər 20-30 dəqiqədən bir dəyişmək prosesi sürətləndirir. Bu üsulla buzu açılan qidalar dərhal bişirilməlidir.

Mikrodalğalı sobanın "defrost" (buz açma) funksiyası qidanı çox qısa müddətdə açır. Lakin buzun bərabər açılması üçün qidanı tez-tez çevirmək lazımdır. Bəzi hissələrin bişməyə başlamamasına diqqət edin. Mikrodalğalı sobada açılan məhsullar gözləmədən ocağa qoyulmalıdır.

Qidaları mətbəx piştaxtasının (masanın) üzərində saxlamaq sağlamlıq üçün risklidir. Otaq istiliyi bakteriyalar üçün ideal mühitdir. Xüsusilə ətin çöl hissəsi açılarkən daxili hissəsinin donmuş qalması həm təhlükə yaradır, həm də qidanın bərabər bişməsinə mane olur.

Qidaları dondurmazdan əvvəl porsiyalara ayırmaq gələcəkdə işinizi xeyli asanlaşdırır. Kiçik hissələr həm daha sürətli açılır, həm də israfın qarşısını alır. Beləliklə, ehtiyacınız qədərini götürüb aça bilərsiniz və yenidən dondurma ehtiyacı yaranmaz.

Lalə Qüdrətova
Milli.Az