Yastıqlardakı sarı ləkələrə son: İlk günkü kimi tərtəmiz olacaq

Yastıq və yataq dəstlərində zamanla yaranan xoşagəlməz sarı ləkələr bir çoxumuzun ortaq problemidir. Tər, dəri yağı və nəmin birləşməsindən yaranan bu ləkələrdən qurtulmaq üçün bahalı kimyəvi vasitələrə və ya parça üçün zərərli olan ağardıcılara (xlora) ehtiyac yoxdur. Ev şəraitində hazırlanan sadə bir qarışıqla bu problemdən bir gecədə qurtulmaq mümkündür.

Milli.Az xəbər verir ki, mütəxəssislər bildirirlər ki, yastıqların saralması əsasən bədənimizin ifraz etdiyi tər və yağların parçaya hopması ilə bağlıdır. Xüsusilə isti aylarda bu proses daha da sürətlənir. Maraqlıdır ki, çoxlarımızın istifadə etdiyi ağardıcılar bəzi hallarda bu ləkələri daha da qalıcı edə bilir.

Ləkələri kökündən həll etmək üçün cəmi üç əsas məhsula ehtiyacınız var:

• Soda (Karbonat)
• Maye qab yuyan yuyucu vasitə
• Çox isti su

Geniş bir qabda isti suyu, sodanı və qab yuyan mayeni qarışdırın. Yastığı bu qarışığa tamamilə batırın və əlinizlə bir az ovxalayaraq qarışığın parçaya dərindən hopmasını təmin edin. Maksimum nəticə üçün yastığı bu suda bir gecə (və ya ən az 1 saat) saxlayın. Bu müddət qurumuş və yerləşmiş ləkələrin yumşalması üçün vacibdir.

Gözləmə müddətindən sonra yastığı təmiz su gələnə qədər durulayın. Daha sonra yastığın etiketindəki təlimata uyğun olaraq paltaryuyan maşında isti su rejimində yuyun.

Bu prosesdə yumşaldıcıdan istifadə etməmək tövsiyə olunur. Əvəzində maşının yuyucu toz gözünə bir az ağ sirkə əlavə etsəniz, həm xoşagəlməz qoxular yox olar, həm də yuyucu qalıqları tam təmizlənər.

Əgər ləkə çox böyük deyilsə, sadə bir diş pastası ilə də nəticə ala bilərsiniz. Ağ rəngli (gel olmayan) diş pastasını ləkənin üzərinə sürtün, fırça ilə yayın və 30 dəqiqə gözləyin. Sonra yastığı adi qaydada yuyun. Diş pastasının tərkibindəki yüngül ağardıcı elementlər parçanı zədələmədən ləkəni aparacaq.

Lalə Qüdrətova
Milli.Az