Bu 7 peşədə çalışanlar gələn il risk altında

İngiltərədə aparılan geniş araşdırma göstərib ki, gələn il süni intellekt (AI) səbəbindən bəzi peşələr ciddi risklə üzləşə bilər.

Milli.Az xəbər verir ki, Chartered Institute of Personnel and Development (CIPD) tərəfindən aparılan tədqiqatda 2.000-dən çox işəgötürənin işə qəbul, əmək haqqı və işdən çıxarma planları öyrənilib. Nəticələr göstərir ki, hər altı işəgötürəndən biri (17%) hesab edir ki, süni intellekt texnologiyaları gələn 12 ayda işçi sayını azalda bilər.

İştirakçıların 62%-i isə bunun xüsusilə idarəçilik, katiblik, aşağı səviyyəli menecment və peşəkar ofis işçilərinə təsir edəcəyini bildirib.

Böyük özəl şirkətlərin 26%-i işçi sayının azalacağını proqnozlaşdırır.

Dövlət sektorunda bu göstərici 20%, kiçik özəl müəssisələrdə isə 17% olub.

İşçi sayını azaltmağı planlaşdıran şirkətlərin 26%-i mövcud işçilərin 10%-dən çoxunu işdən çıxarmağı gözləyir. Həmçinin hər beş işəgötürəndən biri (22%) 2025-ci ilin son rübünə qədər kütləvi işdən çıxarmalar planlayır. Eyni zamanda 61% yeni işçilərin qəbulunu düşünür.

CIPD-nin əmək bazarı üzrə aparıcı iqtisadçısı Ceyms Kokett bildirib: "Süni intellekt bir çox işin görülmə formasını dəyişdirir və məhsuldarlıq potensialı böyükdür. Lakin eyni zamanda bir çox işçini geri qoyma riski daşıyır. Ən böyük təhlükə gənc və aşağı vəzifəli işçiləri təhdid edir."

Onun sözlərinə görə, AI dövründə hər kəsin yenidən təhsil alması və yeni bacarıqlar qazanması vacibdir. Hökumətin uzunmüddətli əmək bazarı planlaması və bacarıq inkişafına sərmayə qoyması zəruridir.

İngiltərə Statistika Ofisinin (ONS) məlumatına görə, 2025-ci ilin sentyabrında işsizlik 5%-ə yüksəlib. Bu, pandemiyanın təsirini nəzərə almadıqda 2016-cı ildən bəri ən yüksək göstəricidir.

AI tərəfindən risk altında olan 7 peşə:

Ofis, idarəçilik və katiblik işləri - 62% risk

Menecer və yüksək səviyyəli idarəçi - 28% risk

Satış və xidmət sektoru işçiləri - 27% risk

Yarı ixtisaslı və ixtisası olmayan işçilər - 23% risk

Hüquq, maliyyə və digər peşəkar sahələr - 17% risk

Usta, sənətkar və ixtisaslı əl işləri - 13% risk

Ustabaşı və sahə meneceri - 10% risk

Lalə Qüdrətova
Milli.Az