Evdə qalan balıq qoxusunu yox etmək üçün ən təsirli üsullar

Balıq bişirdikdən sonra evdə qalan ağır qoxunu aradan qaldırmaq üçün bir neçə təbii və effektiv üsul mövcuddur. Sirkə, limon, qəhvə çöküntüsü və soda kimi sadə vasitələr evin havasını qısa zamanda təmizləyir. Bu metodlar həm praktik, həm də sağlamlıq üçün uyğundur.

Milli.Az xəbər verir ki, balığın tərkibindəki təbii yağlar və kəskin aroma, bişirmə zamanı mətbəxə və evin digər hissələrinə yayılır. Xüsusilə qızartma zamanı pərdə, xalça və mebel kimi yerlərə hoparaq uzun müddət qalır. Sadəcə havalandırma bəzən kifayət etmir, buna görə qoxunu mənbəyində zərərsizləşdirən təbii üsullar daha effektlidir.

Sirkə ağır qoxuları udma xüsusiyyəti ilə tanınır. Balıq bişirdikdən sonra kiçik bir qabda su və sirkəni qaynatmaq otaqdakı pis qoxunu tez bir zamanda azaldır.

Eyni zamanda mətbəx səthlərini sirkə ilə silmək də qalan qoxuların tamamilə yox olmasına kömək edir.

Limon dilimləri və portağal qabığı balıq qoxusunu ört-basdır etməkdə çox təsirlidir. Balıq bişirərkən tavaya bir neçə limon dilimi əlavə etmək qoxunun yayılmasını azaldır.

Sonradan evin müxtəlif yerlərinə limon qabığı qoymaq ortamı təravətləndirir.

Qəhvə çöküntüsü pis qoxuları udmaqda güclü təbii vasitədir. Balıq bişirdikdən sonra mətbəxə bir neçə kiçik qaba qəhvə çöküntüsü qoymaq qoxunun qısa müddətdə yox olmasına yardım edir.

Balıq qoxusu ən çox mətbəx səthlərində qalır. Soda bu qoxunu yox etmək üçün effektivdir.

İlıq suya soda əlavə edib qaz sobasını silmək həm təmizlik, həm də qoxunun tam itməsi üçün ideal üsuldur.

Balıq bişirdikdən sonra pəncərələri açmaq ilk addımdır, lakin bəzən kifayət etməyə bilər. Bu zaman adaçayı və ya dəfnə yarpağı yandıraraq təbii tütsü yaratmaq qoxunu aradan qaldırır.

Bitki tütsüləri həm pis qoxunu ört-basdır edir, həm də evin havasını yeniləyir.

Lalə Qüdrətova
Milli.Az