Hadisə

Fırtına vurdu, kapitan Hüseynovun gəmisi saya oturdu - Borca görə həbs qoyulmuşdu

31 Yanvar 2021 15:09

Baxış: 1 715

#GƏMİ

Neçə vaxtdır İstanbulun Zeytunburnu sahillərində borca görə üzərinə həbs qoyulmuş və azərbaycanlı kapitanın idarə etdiyi quru yük gəmisi dünən şiddətli fırtına səbəbindən saya oturub.

Milli.Az virtualaz.org-a istinadən bildirir ki, ötən gün yanvarın 30-da yerli vaxtla saat 12 radələrində gəmini dalğalar sahilə tərəf atıb və kapitan İlham Hüseynov bu haqda polisə məlumat verib. Hadisə yerinə sahil mühafizə xidmətinin, sahil polisinin, asayiş polisinin və təcili tibbi yardımın əməkdaşları gediblər.

"Streamline" adlı 108 metrlik yük gəmisi Comor adaları bayrağı altında üzürdü. Hadisə yerinə gedən polis və sahil mühafizə xidməti əməkdaşları kapitan Hüseynovu və heyət üzvü Nurlon Glinjovu xüsusi sistemin köməyi ilə gəmidən çıxarıblar. Gəmi özü isə hazırda qayalara bağlanmış vəziyyətdə gözləməkdədir və hava şərtləri imkan verən kimi gəminin sayadan qaldırılması gözlənilir.

Marinetraffic.com saytında gəminin hazırkı sahibini, hansı şirkətə məxsus olması barədə məlumatlar bağlıdır. Lakin gəminin əvvəlki sahibinin Rusiyada qeydiyyatdan keçmiş "OMSKİY-98" adlı firma olduğu göstərilir.

Milli.Az