Bakıda dəhşətli avtobus qəzasında ölən və yaralananların adı məlum oldu - YENİLƏNİB

13:20

Bakının Lökbatan qəsəbəsində yol-nəqliyyat hadisəsi nəticəsində 1 nəfər ölüb, 7 nəfər yaralanıb.

Daxili İşlər Nazirliyinin (DİN) mətbuat xidmətindən Milli.Az-a verilən məlumata görə, aprelin 6-da saat 18 radələrində Qaradağ rayonunun Lökbatan qəsəbəsində Bakı şəhər sakini Zakir Mirzəyevin idarə etdiyi "Mercedes" markalı mikroavtobus və Gürcüstan vətəndaşı Polad Quliyevin idarə etdiyi "Daewoo" markalı 194 saylı xətt avtobusu toqquşub.

Bununla əlaqədar Z.Mirzəyev və P.Quliyev düşüb mübahisə edərkən Salyan rayon sakini Cahid Babayev idarə etdiyi "Daewoo" markalı 211 saylı xətt avtobusu ilə hər iki sürücünü və onların idarə etdikləri avtomobilləri vurub. Nəticədə P.Quliyev xəstəxanaya aparılarkən yolda ölüb, Z.Mirzəyev və 6 sərnişini xəstəxanaya yerləşdirilib.

Qaradağ RPİ tərəfindən araşdırma aparılır.

--------
11:00

Bakıda 3 sərnişin avtobusu toqquşub. Qaradağ Rayon Polis İdarəsindən APA-ya verilən məlumata görə, hadisə ötən gün axşam saatlarında, "Sədərək" ticarət mərkəzinin yaxınlığında yerləşən dairədə qeydə alınıb.
 
194 saylı xətt üzrə hərəkət edən "Daewoo" ,"Mercedes" və  211 saylı xətt üzrə hərəkət edən "Daewoo" markalı sərnişin avtobusları  toqquşub. Nəticədə avtobuslarda olan sərnişinlər Gülgəz Yunis qızı Hüseynova, Vüqar Arif oğlu Şamilli, Elmin Cavanşir oğlu İslamov, Polad İsmayıl oğlu Quliyev, Alim Əbülfəz oğlu Əlizadə, Tural Vaqif oğlu Kərimov, Fazil Mirayaz oğlu Mirzəyev xəsarət alaraq xəstəxanaya yerləşdiriliblər.

Polisdən baş verən qəza zamanı bir nəfərin öldüyü və hələlik onun şəxsiyyətinin məlum olmadığı bildirilib.

----------
10:24

Bakıda sərnişin avtobuslarının iştirakı ilə ağır yol-nəqliyyat hadisəsi baş verib.

Lent.az-ın məlumatına görə, Qaradağ rayonu ərazisində, Sədərək ticarət mərkəzinin yaxınlığında 194 saylı xətt üzrə sərnişindaşıma ilə məşğul olan "Daewoo" markalı avtobusla fəhlələri daşıyan "Mercedes" markalı mikroavtobus toqquşub.

Nəticədə hər iki nəqliyyat vasitəsinə ciddi ziyan dəyib və sürücülər, eləcə də avtobuslarda olan sərnişinlər düşərək mübahisə etməyə başlayıblar. Bu zaman 211 saylı xətt üzrə hərəkət edən digər "Daewoo" markalı sərnişin avtobusu yolda cəmləşmiş insanlara çırpılıb. Nəticədə "Mercedes" markalı mikroavtobusun sürücüsü hadisə yerindəcə keçinib. Daha 7 nəfər isə müxtəlif dərəcəli xəsarətlərlə xəstəxanaya yerləşdirilib.

Faktla bağlı cinayət işi açılıb, araşdırmalar aparılır.

Milli.Az