Hadisə

İspaniyada terror əməliyyatları güclənib: 117 nəfər saxlanılıb

9 Avqust 2026 09:45

Baxış: 998

VTB-də minimal faiz dərəcəsi ilə nağd kredit 9.9%-dən

Avropada miqrasiya böhranının yenidən kəskinləşməsi fonunda radikal islamçı terror təhlükəsi ilə bağlı müzakirələr də intensivləşib. Xüsusilə İspaniyanın Şimali Afrikadakı Seuta anklavında son günlər müşahidə olunan miqrant axını Avropada təhlükəsizlik məsələsini yenidən gündəmə gətirib.

Milli.Az xəbər verir ki, Avropa ölkələrinin təhlükəsizlik qurumları son dövrlərdə radikallaşmada və terror təşkilatları ilə əlaqədə şübhəli bilinən şəxslərə qarşı əməliyyatları gücləndirib.

Avropa İttifaqının hüquq-mühafizə agentliyi "Europol"un 2026-cı il hesabatına əsasən, 2025-ci ildə Aİ ölkələrində terrorla əlaqəli cinayətlərə görə ümumilikdə 486 nəfər saxlanılıb. Onlardan 347-si cihadçı terrorçuluqla bağlı cinayətlərdə şübhəli bilinib.

Cihadçı terrorçuluqla bağlı saxlanılanların sayına görə İspaniya Aİ ölkələri arasında ilk sırada yer alıb. Ölkədə bu istiqamətdə 100 nəfər saxlanılıb. Terrorun bütün kateqoriyaları üzrə isə İspaniyada saxlanılan şəxslərin ümumi sayı 117 nəfər təşkil edib.

"Europol"un hesabatında bildirilir ki, 2025-ci ildə Aİ ərazisində ümumilikdə 45 tamamlanmış, uğursuzluqla nəticələnmiş və ya qarşısı alınmış terror aktı qeydə alınıb. Onlardan 24-ü cihadçı terrorçuluqla əlaqəli olub.

Hesabata görə, cihadçı terror aktları ötən il Aİ-də ən ölümcül terror kateqoriyası olub. Bu hücumlar nəticəsində 5 nəfər həyatını itirib, 81 nəfər isə yaralanıb.

Müəllif: Malik Məlikov (Milli.Az redaktor)