Ölü doğulan körpənin meyitini zirzəmidə gizlədən klinika ilə bağlı qərar verildi

Səhiyyə Nazirliyinin Analitik Ekspertiza Mərkəzi (AEM) "Vital Hospital" kimi tanınan "Sağlamlıq və Gözəllik Mərkəzi" MMC-də aparılan plandankənar yoxlama zamanı insan həyatı və sağlamlığı üçün təhlükə yaradan çoxsaylı qanun pozuntuları aşkarlayıb.

Milli.Az xəbər verir ki, mərkəzdən bildirilib ki, yoxlama 21-23 iyul tarixlərində həyata keçirilib. Nəticədə tibbi alətlərin sterilizasiyası, dezinfeksiya, dezinseksiya və deratizasiya işlərinin sanitariya norma və qaydalarına uyğun aparılmadığı, həmçinin lisenziya şərtlərinin pozulduğu müəyyən edilib.

Yoxlama zamanı bir sıra tibbi xidmət sahələri üzrə zəruri prosedur və qəbul otaqlarının təşkil edilmədiyi, rentgen fəaliyyəti üçün xüsusi icazənin müddətinin başa çatdığı, radioloji sənədlərin təqdim olunmadığı aşkarlanıb.

Bundan başqa, tibbi tullantıların idarə olunması, saxlanılması və çeşidlənməsi qaydalara uyğun həyata keçirilməyib. Müəssisədə yararlılıq müddəti bitmiş dərman vasitələrinin saxlanıldığı, dərmanların mühafizəsi ilə bağlı tələblərin pozulduğu da müəyyən edilib.

AEM həmçinin bəzi əməkdaşların ixtisaslarına uyğun olmayan vəzifələrdə çalışdığını, lisenziyada nəzərdə tutulmayan kosmetoloji xidmətlərin göstərildiyini və bəzi işçilərin əmək müqavilələrinin yoxlamaya təqdim edilmədiyini açıqlayıb.

Qeyd olunan pozuntular nəzərə alınaraq, müəssisədə stasionar tibbi xidmətin fəaliyyəti dayandırılıb. Klinikaya nöqsanların 10 iş günü ərzində aradan qaldırılması barədə göstəriş verilib. Bu müddətdən sonra müəssisədə təkrar yoxlama aparılacaq və nəticəyə uyğun qərar veriləcək.

Xatırladaq ki, son günlər "Vital Hospital" ölü doğulan körpənin meyitinin zirzəmiyə atıldığı iddiaları ilə gündəmə gəlmişdi. Hadisənin ictimailəşməsindən sonra Səhiyyə Nazirliyi klinikada araşdırmalara başlamışdı.

Müəllif: Nərmin Mahmudova (Milli.Az müxbir)