Hadisə

Keçmiş müdafiə naziri dəfn edildi - YENİLƏNİB

28 May 2024 14:10

Baxış: 2 808

VTB-də minimal faiz dərəcəsi ilə nağd kredit 9.9%-dən

#HADİSƏ #AZƏRBAYCAN RESPUBLİKASI MÜDAFİƏ NAZİRLİYİ

Mayın 28-də vəfat edən ehtiyatda olan general-mayor Dadaş Rzayev İkinci Şəhidlər xiyabanında son mənzilə yola salınıb.

Milli.Az Trend-ə istinadən bildirir ki, dəfn mərasimində müdafiə nazirinin birinci müavini - Azərbaycan Ordusunun Baş Qərargah rəisi və Müdafiə Nazirliyinin digər rəhbər heyəti, mərhumun ailə üzvləri, yaxınları, döyüş yoldaşları və ictimaiyyət nümayəndələri iştirak ediblər.

Ehtiram ənənələrinə uyğun olaraq hərbi orkestrin müşayiətilə Azərbaycan Respublikasının Dövlət Himni səsləndirilib, D.Rzayev son mənzilə yola salınıb, məzarı üzərinə əklil və gül dəstələri qoyulub, ruhuna dualar oxunub. Tabut üzərindəki üçrəngli Azərbaycan bayrağı əbədi xatirə kimi saxlanılması üçün mərhumun ailəsinə təqdim edilib.

Mərasimdə D.Rzayevin həyat və xidmət yolu haqqında danışılıb. Qeyd olunub ki, o vəzifə borcunu layiqincə yerinə yetirdiyinə görə dəfələrlə müxtəlif orden və medallara layiq görülüb.

Vurğulanıb ki, general-mayor D.Rzayev xatirəsi Azərbaycan Ordusunun şəxsi heyətinin və onu tanıyanların qəlbində daim yaşayacaq.

--------

00:42

Azərbaycanın sabiq müdafiə naziri Dadaş Rzayev vəfat edib.

Milli.Az qafqazinfo-ya istinadən xəbər verir ki, bu barədə onun yaxınları sosial şəbəkədə məlumat paylaşıb.

Onun 88 yaşında uzunsürən xəstəlikdən dünyasını dəyişdiyi bildirilir.

Qeyd edək ki, general-mayor D.Rzayev 20 fevral 1993-cü ildən həmin ilin 17 iyununadək müdafiə naziri vəzifəsində çalışıb.

Milli.Az