Qəssab kimi həkimlər - onlardan uzaq durun

Ayrı-ayrı peşə sahiblərinin iş fəaliyyətində buraxdıqları səhvlərə, işə məsuliyyətsiz yanaşmalarına dünyanın bütün ölkələrində rast gəlmək olar. Təbii ki, belə hallar fəsadsız ötüşmür. Əgər müəllim məsuliyyətsizdirsə şagird savadsız olur, sürüşü səhv edirsə qəza ehtimalı artır, bağban öz işinə dırnaqarası yanaşırsa məhsuldarlıq olmur və sair və ilaxır... Amma vay o gündən ki, şəfqət tapmaq üçün üz tutduğun həkim öz içində məsuliyyətsiz olsun.

Milli.Az modern.az-a istinadən həkim məsuliyyətsizliyinin acı nəticələri ilə bağlı yazını təqdim edir. 

Yəqin heç kim ağlına gətirməz ki, məsuliyyətsizlik ucbatından həkimə müraciət edən insanın xəstə ayağı əvəzinə sağlam ayağını kəssinlər. Ancaq bu faktdır. 1995-ci ildə Floridada 52 yaşlı Villi Kinqin sağ ayağı əvəzinə sol ayağını kəsiblər. Xəstə narkozdan ayıldıqdan sonra sol ayağının olmadığını görəndə təəcübdən az qala ürəyi partlasın. Xəstəni sakitləşdirmək üçün onu inandırmağa çalışıblar ki, sol ayağında da ciddi problem olub və onlar bu əməliyyatı şüurlu surətdə həyata keçiriblər. Villi Kinq həkimlərin sərsəmləməsinə məhəl qoymadan məhkəməyə müraciət edib. Xəstənin iddiası məhkəmədə təmin olunub. O, bir ayağının əvəzində həkimdən 900 min dollar, xəstəxanadan isə 250 min dollar kompensasiya alıb. 

Digər bir həkim məsuliyyətsizliyi isə 10 yaşlı uşağı görmə qabiliyyətindən məhrum edib. Tomas Styuart jurnaldan rəngli şəkilləri kəsərkən qayçı gözünə batıb. Bunun nəticəsində həmin gözünün görmə qabiliyyəti zəifləməyə başlayıb. Həkimlər zədələnmiş gözün çıxarılmasını məsləhət görüblər. Əməliyyatı göz cərrhı Aleksandr Praudfut edib. Əməliyyat "uğurla" həyata keçib. Cərrah xəstə gözün əvəzinə cağlam güzü çıxarıb. 

Cərrahların əməliyyatdan sonra qarın boşluğunda hansısa bir tibbi əşyanın yaddan çıxarıb götürməməsi ilə bağlı çox hadisələr olub. Belə bir hadisə amerikalı Donald Çerçin də həyatında baş verib. 2000-ci ildə Vaşinqton tibb mərkəsində aparılan əməliyyatdan sonra həkim məsuliyyətsizliyi ucbatından 31 santimetr uzunluğunda cərrahi alət xəstənin qarın boşluğunda qalıb. Donald Çerç bu aləti həkimlərə havayı qaytarmayıb. O məhkəmə vasitəsilə huşsuz cərrahdan 97 min dollar alıb. 

Cərrahların huşsuzluğu ilə bağlı daha bir hadisə Hindistanda baş verib. 2007-ci ildə Səbnam Pravinin oğlu dünyaya gəlib. Doğuş qeysəriyyə yolu ilə həyata keçirilib və uğurlu olub. Ancaq bir neçə gündən sonra gənc ananın sağlamlığında problemlər yaranıb. Üç il ərzində aparılan müayinələr Səbnamın problemini üzə çıxara bilməyib. Nəhayət həkimlər cərrahi müdaxilə qərarını veriblər. Məlum olub ki, doğuş zamanı qarın boşluğunda bir neçə ədəd salfet qalıb. Hindistanlı xanım oğul övladının xatirinə həkimləri məhkəməyə verməyib. 

Moskvada 61 saylı şəhər xəstəxanasının çərrahı və tibb bacısı isə məsuliyyətsizliklərinə görə azadlıqdan məhrum olublar. 2002-ci ildə həmin xəstəxanada əməliyyat zamanı xəstənin qarın boşluğunda qalan 60 santimetrlik salfet ölümlə nəticələnib. "Uğurlu" əməliyyatın müəllifləri 5 il müddətinə türməyə göndərilib.

Allah öz bəndəsini belə məsuliyyətsiz ağ xalatlılardan qorusun. Çalışın belə həkimlərdən uzaq olasınız.

Milli.Az