Baş ağrısı və göz sulanmasının əyləncəli səbəbi

Sirr deyil ki, bu gün 3D filmlərinə tələbat daha çoxdur

Hamımız da belə filmləri sevə-sevə izləyirik. Amma bu cür filmlərin ziyanı, mənfi təsiri haqqında isə çoxumuz heç düşünmürük də.

Oftalmoloq Xəlil Özcanın fikrincə, 3 ölçülü televizorlardan gündəlik istifadə heç də yaxşı deyil. Çünki bu cür televizorlar normal televizorlarla müqayisədə gözü daha çox yükləyir. Eynəkli 3 ölçülü televizorların eynəkləri isə göz üçün böyük təhlükədir. Çünki bu cür eynəklərdən 2-3 saat istifadə olunsa belə gözə böyük yük düşür: "İnsan 2 gözü sayəsində ətrafında olan hər şeyi - hadisələri, əşyaları 3 ölçülü görür. Topun yaxınlaşmasını, əlin digər ələ necə toxunmasını insan gözü bəlkə də 3 ölçüdən daha yaxşı görür. Gözün bir-birindən az da olsa ayrı olması iki fərqli perspektivi beyinə ötürür. Bir gözün gördüyü və ikinci gözün gördüyü iki mənzərə beyinə ötürüldüyündə beyin 3D rəsmlərini hesablayır. 3D televizorları və ya filmləri də bu yolla hazırlanır. İki fərqli linzadan çəkilən görüntülər insanda elə hiss yaradır ki, sanki televizordan kənara əşyalar, insanlar çıxa bilir. Bu, tamamilə göz yanılmasıdır. Bu gün 3 ölçülü istehsal olunan televizorlara bütün ailə baxarkən eyni effektləri görür. Ekranın ön hissəsində daxili linzalara malik nazik lentikulyar örtük yerləşdirilir. Bunun nəticəsində işıq şüaları sınaraq displeyin qarşısında 9 nöqtədə toplayır. Əgər izləyicinin gözü bu 9 zonadan birinə düşərsə, onda həcmli təsvir illüziyası yaranır. Bununla da bütün ailə bir televizordan eynəksiz 3 ölçülü film izləyə bilir".

Oftalmoloq bildirir ki, bu cür televizorların mənfi təsirini izləyici çox vaxt başqa amillərə bağlayır. Onlar televizorla bədəndəki narahatlıq arasında bağ qura bilmir. Ürək bulantılarının, baş ağrıların, göz qızartısı, sulanması, damarların üzə çıxmasının səbəbi də elə bu televizorlardır: "Gözündə heç bir problemi olmayan insanlar uzun müddət 3D izlədikdən sonra mənfi təsiri hiss edə bilərlər. Lakin gözlərində zəiflik, ağrı olan izləyici uzağı 2 filmdən sonra gözlərindəki ciddi narahatlığı hiss edəcək. 3D eynəkləri, eləcə də televizorlarından mütəmadi istifadə göz yorğunluğu, baş ağrısı, gözlərin ikili görməsinə səbəb ola bilir. Bundan əlavə, əgər izləyici hər kəs kimi 3D görüntüləri istər televizordan, istərsə də gözlüklə görə bilmirsə, bu o deməkdir ki, izləyicidə göz tənbəlliyi, yaxud göz zəifliyi mövcuddur. Tam sağlam olmayan göz 3D ölçülü filmləri izləsə belə adi televizor effektlərini görəcək".

Müsahibimiz 3D eynəkləri ilə film izləyənləri daha diqqətli olmağa çağırır. Belə ki, onun sözlərinə görə, bu cür eynəklərin şüşələri tünd olduğundan film izlənilən an göz bəbəklərində böyümə olur. "Daha sonra göz hədddindən artıq işığa məruz qaldığında qədərindən daha çox işıq qəbul edir ki, bu da gözün zədələnməsi deməkdir".

Bu gün kinoteatrlarda da 3D filmlərinin nümayişləri olur. Bu filmlərə gənclər arasında maraq böyükdür. Hətta elə filmlər var ki, onlar 2D və 3D kimi izləyicilərə təklif olunur. Kinoteatrlardan bildirirlər ki, bu filmlərə maraq böyükdür. Xüsusən də gənclər arasında. Ancaq dünya alimlərinin apardığı araşdırma nəticəsində məlum olub ki, tamaşaçıların əksəriyyəti üçölçülü təsvirli filmlərə baxa bilmir, çünki belə filmlərə baxdıqdan sonra vəziyyətləri pisləşir, onlarda ürəkbulanma, başgicəllənmə, başağrısı əlamətləri müşahidə olunur. Bu isə lokomosiya xəstəliyinin (orqanizmin bir yerdən digərinə hərəkəti) klassik əlamətləridir. Məsələ bundadır ki, ekranda yaradılan üçölçülü məkan illüziyası beyinin və görmə orqanlarının fəaliyyətinə pis təsir göstərir.

Oftalmoloq xüsusilə vurğulayır ki, 8 yaşından kiçik olan uşaqlara qətiyyən 3D filmlərinə baxmağa icazə verilməməlidir.

Eskpress.az