Gündə 1 stəkan içsəniz...

Alimlər bildirirlər ki, hər gün bir stəkan süd içmək sağlamlığa müsbət təsir göstərə bilər.

Milli.Az bildirir ki, araşdırmalara görə, bu vərdiş insult riskini 10 faizə qədər azalda bilər.

Araşdırma nəyi göstərib?

Yaponiyalı alimlər müəyyən ediblər ki, gündə təxminən 180 qram (bir standart stəkan) süd qəbul edən 30-79 yaş arası insanlarda insult riski daha aşağı olur.

Hesablamalara əsasən 10 il ərzində insult riski orta hesabla 7 faiz azalır, bəzi qruplarda bu göstərici 10,6 faizə qədər çatır. Model analizləri göstərib ki, süd istehlakının artırılması 10 il ərzində 123 mindən çox insult halının qarşısını ala və təxminən 19 min insanın həyatını xilas edə bilər.

Süd damarlar üçün niyə faydalıdır?

Mütəxəssislər bu təsiri südün tərkibi ilə əlaqələndirirlər. Süd kalsium, kalium və maqnezium kimi minerallarla zəngindir.

Bu maddələr arterial təzyiqi tənzimləməyə kömək edir, damarları rahatladır və qan dövranını yaxşılaşdırır. Bunlar isə insultun qarşısının alınmasında əsas amillərdir.

Hansı süd daha faydalıdır?

Araşdırma müəllifləri qeyd edir ki, südün növü də əhəmiyyətli ola bilər. Əvvəlki tədqiqatlara görə az yağlı süd daha güclü qoruyucu təsir göstərə bilər, yağlı süd isə eyni dərəcədə fayda göstərmir. Bununla belə, son araşdırmada süd növləri ayrıca müqayisə olunmadığı üçün əlavə tədqiqatlara ehtiyac var.

Niyə süddən imtina etmək olmaz?

Ekspertlər xəbərdarlıq edir ki, süd və süd məhsullarından imtina orqanizmdə vacib maddələrin çatışmazlığına səbəb ola bilər. Süd yüksək keyfiyyətli zülal, B12 vitamini, yod sümüklər və dişlər üçün vacib kalsium mənbəyidir. 

Mütəxəssislərin fikrincə, balanslı qidalanmanın bir hissəsi kimi gündəlik süd qəbulu ürək-damar sağlamlığını qorumağa kömək edə bilər. Bununla belə, fərdi sağlamlıq vəziyyəti nəzərə alınmalı və lazım olduqda həkim məsləhəti alınmalıdır. /Lent.az

Milli.Az