"Eyni evdə yaşayıb, fərqli dünyalarda yaşayan cütlüklər çoxalıb” - Mütəxəssisdən XƏBƏRDARLIQ

"Son zamanlar cütlüklər arasında baş verən anlaşılmazlıqlar, qarşılıqlı etimadın azalması və emosional uzaqlaşma hallarının artması mütəxəssisləri narahat edir. Mütəxəssislər bildirirlər ki, bu cür problemlərin vaxtında həll edilməməsi münasibətlərin dağılmasına gətirib çıxara bilər".

Psixopedaqoq Sevda Əliyeva Milli.Az-a açıqlamasında bildirib ki, son illərdə cütlük terapiyasına müraciət edənlərin sayı artmaqdadır.

Onun sözlərinə görə, cütlük terapiyası münasibətləri xilas edə bilər:

"Əvvəllər insanlar ailə münasibətlərində problem yarananda onu gizlətməyə çalışırdılar. İndi isə cütlüklər daha çox psixoloqa və ya terapevtə müraciət edirlər. Bu, çox pozitiv bir haldır, çünki münasibətdəki gərginliklər zamanında aradan qaldırılanda ayrılıq riski də azalır".

Mütəxəssisin sözlərinə görə, cütlük terapiyası partnyorlar arasında qarşılıqlı anlayışı bərpa etməyə, ünsiyyət bacarıqlarını inkişaf etdirməyə və duyğusal yaxınlığı gücləndirməyə yönəlmiş bir prosesdir.

"Terapiyada əsas məqsəd tərəflərin bir-birini dinləməsini, anlaşılmayan duyğuları ifadə etməsini və münasibətdə məsuliyyət paylaşımını öyrətməkdir. Əksər hallarda problem bir hadisədən deyil, illərlə toplanan emosional yüklərdən qaynaqlanır," - deyə Sevda Əliyeva əlavə edib.

Psixopedaqoq vurğulayır ki, son dövrlərdə cütlüklər arasında ən çox müşahidə olunan anlaşılmazlıqlar bunlardır:

Qarşılıqlı diqqət və anlayışın azalması

Sosial mediada yaranan qısqanclıq halları

Maddi və emosional yükün bərabər paylanmaması

Kommunikasiya çatışmazlığı və "emosional uzaqlıq"

Sevda Əliyeva qeyd edib ki, terapiya yalnız böhran dövründə deyil, münasibətin sağlam qalması üçün də faydalıdır:

"Cütlük terapiyası bəzən münasibəti xilas edə bilər, bəzən isə tərəflərin bir-birini daha yaxşı tanımasına və gələcək qərarlarını daha sağlam verməsinə yardım edir. Əsas odur ki, tərəflər bir-birinə düşmən kimi deyil, eyni komandanın üzvləri kimi baxmağı öyrənsinlər".

Milli.Az