Sağlamlıq

Özbaşına atılan ağrıkəsicilər böyrəklərin "evini yıxır" - Açıqlama

22 Oktyabr 2025 21:00

Baxış: 361

VTB-də yüksək depozit faizleri daha çox qazandırır

#SAĞLAMLIQ

Həkim ağrıkəsicilərin nəzarətsiz qəbulu zamanı böyrəklərin ciddi zədələnmə riski barədə xəbərdarlıq edib.

Milli.Az xəbər verir ki, rusiyalı nefroloq, tibb elmləri namizədi Aleksey Reznikov açıqlamasında bildirib ki, ağrıkəsicilər səhv istifadə edildikdə böyrəklər üçün ən təhlükəli dərmanlardan biridir.

Onun sözlərinə görə, insanın həkimlə məsləhətləşmədən və ya tibbi müayinə keçmədən özbaşına ağrıkəsici qəbul etməsi fəsad ehtimalını qat-qat artırır. Xüsusilə bu dərmanların asan əldə olunması və aktiv reklam edilməsi vəziyyəti daha da təhlükəli edir.

Reznikov qeyd edib ki, ağrıkəsicilərin nəzarətsiz istifadəsi analgetik nefropatiyaya, yəni böyrək toxumalarının zədələnməsi ilə müşayiət olunan xroniki xəstəliyə səbəb ola bilər. Bu, zamanla böyrəklərin süzmə funksiyasını pozur və ağır hallarda dializ və ya böyrək köçürülməsi zərurəti yarada bilər.

Xəstəliyin ilkin mərhələləri çox vaxt əlamətsiz keçir, buna görə insanlar yalnız şişkinlik, təzyiq artımı və ya sidikdə qan aşkar edildikdə həkimə müraciət edirlər. Onlar isə çox vaxt ağrıkəsici qəbulunu davam etdirərək vəziyyəti daha da pisləşdirirlər.

Mütəxəssis əlavə edib ki, uzunmüddətli fenasetin, aspirin və QNSƏ (qeyri-steroid iltihabəleyhinə dərmanlar) istifadəsi böyrəklərə zərər riskini artırır.

Reznikovun fikrincə, ağrıkəsicilər yalnız həkim məsləhəti ilə və təyin olunmuş dozalarda qəbul edilməlidir. Xüsusilə böyrək, ürək-damar və qaraciyər xəstəlikləri olan şəxslər bu qaydaya ciddi əməl etməlidirlər.

İsmayıl
Milli.Az