3 uşaq atası su içməkdən öldü - FOTO

3 uşaq atası çoxlu su içdiyinə görə vəfat edib.

Milli.Az xarici mətbuata istinadla xəbər verir ki, hadisə İrlandiyanın Dublin şəhərində baş verib.

İrlandiyanın Dublin şəhərində üç uşaq atası Şon O'Donnell çoxlu su içdikdən sonra vəfat edib.

Məhkəmədə açıqlanıb ki, 59 yaşlı O'Donnell xəstəxanada adi bir prosedurdan sonra bol su içməsi tövsiyə edildikdən az sonra "su zəhərlənməsi"ndən həyatını itirib. Tibbi dildə bu vəziyyət hiponatremiya adlanır və eyni xəstəlik Brus Linin də ölüm səbəbi kimi göstərilir.

Mütəxəssislər xəbərdarlıq edirlər ki, qısa müddətdə çox su içmək bədəndə natrium səviyyəsinin təhlükəli dərəcədə düşməsinə səbəb olur. Natrium suyun toxumalarda tənzimlənməsinə kömək edir və səviyyə çox aşağı düşəndə su hüceyrələrdə toplanaraq onların şişməsinə səbəb olur. Beyində bu proses xüsusilə təhlükəlidir, çünki orqan kəllə daxilində genişlənə bilmir.

Mütəxəssislər bildirirlər ki, bir saat ərzində 1,4 litr (təxminən altı stəkan) su içmək belə bu vəziyyəti yarada bilər. Araşdırmalara görə, hiponatremiya diaqnozu qoyulan xəstələrin dörddə biri həyatını itirir.

Hadisə St. Vincent Universitet Xəstəxanasında baş verib. Şon O'Donnell planlaşdırılmış əməliyyatdan sonra su içməyə təşviq edilib, amma içdiyi miqdar nəzarətdə saxlanılmayıb. O, həmin gün saat 7-də beyində şişkinlik, qıcolma və ürək tutmasından dünyasını dəyişib. Xəstəxana öz məsuliyyətini etiraf edib və ailəsinə 35 min avro təzminat ödəyib.

Hiponatremiyaya səbəb olan su miqdarı insandan asılı olaraq dəyişir. ABŞ-nin Xəstəliklərə Nəzarət və Profilaktika Mərkəzi saatda 1,4 litrdən çox su içməməyi tövsiyə edir. Vurğulanır ki, bu məhdudiyyət təkcə suya yox, bütün mayelərə aiddir. Xüsusilə böyrək çatışmazlığı olan şəxslər risk altındadır, çünki onların bədəni artıq mayeni tez çıxara bilmir.

Oxşar hallar idmançılar arasında da qeydə alınıb. 2007-ci ildə London Marafonunda 22 yaşlı idmançı Devid Rocers çoxlu su içdiyi üçün həyatını itirib. 2003-cü ildə isə ABŞ-da iki uşaq anası Eşli Summers 20 dəqiqədə iki litr su içdikdən sonra ölüb. Hətta Bruce Lee-nin də ölüm səbəbinin su zəhərlənməsi olduğu irəli sürülür.

Britaniyanın Səhiyyə Xidməti (NHS) gündə altı-səkkiz stəkan (təxminən iki litr) maye içməyi məsləhət görür. Hiponatremiyanın əlamətləri arasında ürəkbulanma, yorğunluq, əzələ zəifliyi, əsəbilik, baş ağrısı və qıcolmalar var. Xəstəliyin müalicəsi adətən natrium məhlulu olan damar içi (IV) maye və ya dərman vasitəsilə aparılır.

İslam
Milli.Az