Sərgilər

Azərbaycanda məhkum qadınların sayı kəskin artıb - Səbəb

26 Oktyabr 2017 22:49
1 Şərh     Baxış: 1 880

Azərbaycanda məhkum qadınların sayı kəskin artıb.

Milli.Az sputnik.az-a istinadən bildirir ki, bu barədə Azərbaycan Hüquq Müdafiə Mərkəzinin rəhbəri Eldar Zeynalov məlumat verib.

Onun sözlərinə görə, qadın koloniyasında sıxlıq müşahidə olunur. Əvvəllər məhkum qadınların sayı 350 nəfərlik limiti keçmirdi. Hazırda onların sayı 480 nəfərdir ki, onların da çoxunun kiçikmüddətli cəzaları var.

Hüquq müdafiəçisi qeyd edib ki, respublika qadınları dəmir barmaqlıqlar arasına əsasən dələduzluq maddəsi ilə düşürlər. Sonrakı yerlərdə traffikinq (qadın alveri), narkotik ticarəti və digər cinayətlər gəlir.

"Təcrübə göstərir ki, deputatların parlamentdəki və ya mətbuatdakı hər bir çıxışı ölkədə məhbusların sayının artmasına gətirib çıxarır. Deputat çıxış edib deyəndə ki, narkomanların sayı çoxalıb, mübarizəni gücləndirmək lazımdır, dərhal AR Cinayət Məcəlləsinin 234-cü maddəsi (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) ilə ittiham olunan qadınların sayı artır.

Sonra çıxış edirlər: "Rəzalətdir, mənəviyyatımız məhv olur, əxlaqsızlıq baş alıb gedir, ətraf fahişələrlə doludur!". Və dərhal "əxlaqsızlıq yuvaları saxlama" ittihamı ilə qadınları içəri atırlar. O da istisna deyil ki, hakimlərin iştahası koloniyalardakı fiziki limitlə məhdudlaşır. Əks təqdirdə onlar daha çox adamı həbs edərdilər" - deyə Zeynalov əlavə edib.

O qeyd edib ki, yeni qadın koloniyası indiyə qədər istifadəyə verilməli idi. Lakin maliyyə böhranı səbəbində inşaat prosesi yubanır.

"Onlar manat iki dəfə ucuzlaşandan sonra büdcəni iki dəfə artırmaq istəmirlər və bu səbəbdən də tikintidə qənaət edirlər. Eyni problem ömürlük həbs cəzasına məhkum edilənlər üçün olan həbsxanalarda da mövcuddur. Hələ indiyə qədər 5 regional həbsxananı istifadəyə verməyiblər. Yəqin pul yoxdur. Odur ki, mən bu sahədə vəziyyətin yaxşılaşdırılması ilə bağlı arzunu görmürəm. Əksinə hakimiyyət cəzaların humanistləşdirilməsində maraqlıdır. Bu isə təkcə Qərb qarşısında müsbət imic formalaşdırmaqla bağlı deyil, həm də iqtisadi məsələdir. Onlar başa düşürlər ki, böyük həcmdə məhkumların olması artıq xərcdir. Ayılma baş verdi, dövlət yanaşması ortaya çıxdı" - deyə hüquq müdafiəçisi bildirib.

O, həmçinin qeyd edib ki, həbsxanaların həddindən artıq yüklənməsi cəza siyasətini təhrif edir. Hazırda penitensiar müəssisələrdə həddindən artıq ağır cəzalara məhkum edilmiş şəxslər var.

"Nəticədə belə çıxır ki, kiçik oğrular azadlıqda dolaşır və insanlar qəzəblənirlər ki, onlar niyə azadlıqdadır. Əgər yer yoxdursa, onu harada tutub saxlayacaqlar? Burada yeganə arqument ictmai rəylə bağlı deyil, qanunun müddəaları və beynəlxalq standartlara riayət edilməsidir" - deyə o bildirib.

Zeynalov əmindir ki, kiçik cinayətlərə görə adamları həbsxanaya basmaq heç onların islah edilməsi nöqteyi-nəzərindən də düzgün deyil.

"Adam 60 manatlıq mobil telefon oğurlayıbsa, buna görə 1 il həbsdə yatacaq və dövlət də onun üçün 6 min manat vəsait xərcləməli olacaq. Nəticədə də o, həbsxanadan potensial cinayətkar kimi çıxacaq. Artıq o, həbsxana həyatının nə olduğunu bilir. Başa düşür ki, orada yaşamaq olar. Və işləmədən oğurluq edərək pul qazanmaq yolunu tutur. Bir sözlə, həbsxana adamları pozur, məhv edir" - deyə hüquq müdafiəçisi əlavə edib.

Milli.Az

Digər maraqlı xəbərlər Milli.Az-ın Facebook səhifəsində

Milli.Az-ın ən mühüm və maraqlı xəbərlərini "Telegram"da izləyin

loading...

Şərh yaz:

1 Şərh:

  • Anonim
    $.$.$. · 27 Oktyabr 2017 08:1930

    duzgun qərar qəbul edilsə bəlkə bu qadınlar hec olmasa əl cəkər cinayətlər törətməkdən körpə uşaqlı analara imtiyazlar veriləcəksə onlar yenə də oqurluq edəcəklər yaxşısı budur ki iş yerləri acılsın iş yerləri acılsa qadın kişi hamısı işləyər başları qarışar cinayət etmək ucunsə bəhanələri də olmaz

    Cavab yaz

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.