"EİOPA"dan kriptovalyuta xəbərdarlığı: sığorta şirkətləri üçün sərt tələblər gəlir

Avropalı tənzimləyicilər kriptovalyutalara sahib olan sığorta şirkətləri üçün sərt kapital tələbləri təklif edərək, Avropa İttifaqının "Bitcoin" və digər rəqəmsal aktivlərlə bağlı ən sərt mövqeyinin siqnalını veriblər.

Milli.Az valyuta.az-a istinadən xəbər verir ki, Avropa Sığorta və Peşə Təqaüdləri Təşkilatı ("EİOPA") Avropa Komissiyasına müraciət edərək, sığorta şirkətlərinin bütün kripto aktivləri üçün 100% kapital tələbi tətbiq etməsini tövsiyə edib.

Bu addım ABŞ-nin ənənəvi maliyyə qurumları üçün kripto aktivlərə dair məhdudiyyətləri yumşaltmaq istiqamətində atdığı addımlarla eyni vaxtda gerçəkləşib. Məqsəd isə sığorta şirkətlərini rəqəmsal aktivlərə investisiya qoymaqdan çəkindirməkdir. Hazırda əksər Aİ sığorta şirkətləri kripto aktivlər üçün kapitalın 60%-dən 80%-ə qədərini ayırır. Lakin təklif edilən yeni qayda bu əhatəni tam şəkildə məcburi edəcək və rəqəmsal aktivlərin saxlanma xərclərini əhəmiyyətli dərəcədə artıracaq.

"Eiopa"nın təklifi yalnız "Bitcoin" və "Ethereum" kimi kriptovalyutalarla məhdudlaşmır; həmçinin nominal valyutalara bağlı olan stabilkoinləri və borc kağızları və ya səhmlər kimi ənənəvi yatırımlarla dəstəklənən digər tokenləşdirilmiş aktivləri də əhatə edir. Bu, tənzimləyicinin sığortaçılar tərəfindən saxlanılan hər hansı aktiv kateqoriyası üçün ilk dəfə bu qədər ciddi kapital tələbi irəli sürməsi anlamına gəlir.

Sərt mövqeyə baxmayaraq, təklif edilən qaydaların qısamüddətli təsirinin məhdud olacağı gözlənilir. "Eiopa"ya görə, avropalı sığortaçılar 2023-cü ilin sonuna olan göstəricilərə əsasən, təqribən 655 milyon avro dəyərində kripto aktivlərə malik olub və bu, onların ümumi 9,6 trilyon avro dəyərində aktivlərinin 0,01%-dən də azını təşkil edib. Bu aktivlərin əksəriyyəti Lüksemburqda cəmlənib ki, bu da onların birbaşa deyil, investisiya fondları vasitəsilə dolayı yolla saxlanıldığını göstərir.

Milli.Az