Qiymətlər ucuzlaşacaq - Yeni qərar

Son illər bütün dünyada bahalaşma müşahidə olunur. Ölkə başçısı bu bahalaşmanın Azərbaycana təsirlərini minimuma endirmək üçün əlindən gələni edir. Elə məhz dünən Prezident İlham Əliyevin Rəqabət Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında qanunu təsdiqləməsi bunun bariz sübutudur.

Qeyd etdiyim kimi, ötən gün ölkə başçısı Rəqabət Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında qanunu təsdiqləyib. Bu qanunla Azərbaycan Respublikasının 12 fəsil 84 maddədən ibarət Rəqabət Məcəlləsi təsdiq edilib. Milli Məclisin dekabrın 8-də keçirilən plenar iclasında "Azərbaycan Respublikası Rəqabət Məcəlləsinin təsdiq edilməsi haqqında" Qanun III oxunuşda qəbul edilib. Məcəllə "Antiinhisar fəaliyyəti haqqında", "Haqsız rəqabət haqqında", "Təbii inhisarlar haqqında" Azərbaycan Respublikasının Qanunları və digər normativ hüquqi aktları özündə ehtiva edir. Qanun 2024-cü il iyulun 1-dən qüvvəyə minəcək.

Bəs Rəqabət Məcəlləsi nəyə xidmət edəcək?

Adından da göründüyü kimi bu məcəllə birbaşa olaraq sağlam rəqabət mühiti formalaşdıracaq. Rəqabət olan yerdə isə birmənalı olaraq inkişaf, tərəqqi var. Beləliklə, Rəqabət Məcəlləsinin hazırlanma məqsədi ölkəmizdə haqsız rəqabətin aradan qaldırılması üçün hüquqi çərçivənin müəyyən edilməsidir.

Özəl sektorun inkişafı üçün yeni mərhələ hesab edilən Rəqabət Məcəlləsinin üstünlükləri ondan ibarətdir ki, inhisarçılıq meyilləri azalacaq, biznes mühitinin cəlbediciliyi artacaq, azad rəqabət və əlverişli biznes mühiti investisiya qoyuluşlarını artıracaq. Ədalətli rəqabət məhsul və xidmətlərin keyfiyyətini yüksəldəcək. Bundan əlavə bazara giriş maneələrinin aradan qaldırılmasını təmin etməklə, mikro, kiçik və orta sahibkarlığın inkişafına töhfə verəcək. Beləliklə, bazar iştirakçılarının sayı çoxalacaq. Bu da birbaşa qiymətlərin ucuzlaşmasına gətirib çıxara bilər.

Sosial rifahın yüksəlməsinə xidmət edən bu məcəllə sayəsində məhsul və xidmətlərin çeşid seçim imkanı artdığı üçün istehsalın və təklifin artması səbəbindən qiymətlər ucuzlaşacaq. Eləcə də, bu qanunla istehlakçıların hüquqlarının müdafiəsi güclənəcək.

Məlum məsələdir ki, hələ də ölkəmizdə işsiz şəxslər var. Qanunun daha bir üstünlüyü yeni iş yerlərinin açılmasıdır. Nəticədə yüzlərlə şəxs bu qanunun tətbiqi nəticəsində yaranan yeni iş yerlərində çalışaraq evlərinə çörək aparacaq.

Göründüyü kimi Rəqabət Məcəlləsi ölkə iqtisadiyyatının inkişafı, biznes mühitinin əlverişliliyinin artırılması, azad sahibkarlığın təşviqi baxımından mühüm əhəmiyyət kəsb edir. Bu məcəllənin müsbət təsirləri azad olunmuş ərazilərimizin də inkişafından yan ötməyəcək. Rəqabət Məcəlləsinin tətbiqi sayəsində azad olunmuş ərazilərimizin bərpası və yenidənqurulması prosesi daha da sürətlənəcək. 

Bəxtiyar Umarlı
Milli.Az