Azərbaycan qazının effekti: Bolqarıstanda ucuzlaşma

Azərbaycan qazının nəql olunduğu Yunanıstan-Bolqarıstan interkonnektorunun işə düşməsindən sonra Bolqarıstanda qazın topdansatış qiyməti 34 faiz azalıb.

Trend bu barədə Bolqarıstanın Enerji və Su Təsərrüfatı Tənzimlənməsi Komissiyasına (EWRC) istinadən məlumat verir.

Qeyd olunur ki, tənzimləyici qurum oktyabr ayı üçün təbii qazın topdansatış qiymətini 233,36 lev/MVt-saat (116,93 dollar, 119,31 avro) məbləğində müəyyən edib. Bu isə əvvəlki ayla müqayisədə 34 faiz azdır.

"İlk dəfə olaraq Bolqarıstanın Azərbaycanla uzunmüddətli müqavilə üzrə təbii qazın tam həcmi qiymət formalaşdıran hissə olub və nəticədə qazın qiyməti 120 lev azalıb. Azərbaycan təbii qazı daha rəqabətqabiliyyətli qiymətə malikdir, belə ki, bu qaza Avropa fyuçers birjalaranının dalğalanmaları təsir etmir. Bu onunla əlaqədardır ki, Azərbaycan qazının qiyməti altı ay əvvəldən müəyyənləşdirilmiş benzin qiymətlərinə bağlıdır", - məlumatda deyilir.

Qeyd edək ki, IGB Bolqarıstana Azərbaycan qazını, xüsusən də Azərbaycanın "Şahdəniz-2" qaz-kondensat yatağında hasil olunan qazı almağa imkan verəcək qaz kəməridir. IGB TAP-a birləşdiriləcək və onun vasitəsilə "Şahdəniz" yatağından qaz Avropa bazarlarına çıxarılacaq. IGB-nin təməlqoyma mərasimi 22 may 2019-cu ildə Bolqarıstanda baş tutub. 2022-ci il oktyabrın 1-də Bolqarıstanın paytaxtı Sofiya şəhərində interkonnektorun açılış mərasimi keçirilib. Qaz kəmərinin uzunluğu 182 kilometrdir.

Birinci mərhələdə qaz kəmərinin ötürmə qabiliyyəti ildə üç milyard kubmetr qaz təşkil edəcək. İkinci mərhələdə, bazarın inkişafından asılı olaraq, kompressor stansiyasının əlavə edilməsi ilə kəmərin ötürücülük qabiliyyəti ildə 5 milyard kubmetr qaza çatdırıla bilər. Layihənin ümumi investisiya dəyəri təqribən 240 milyon avro (ƏDV istisna olmaqla) qiymətləndirilir, bunun 220 milyon avrosu əsaslı xərclərdir.

Milli.Az