İqtisadiyyat

Aqrobiznes sahəsində imkanlar və çağırışlara dair ictimai müzakirə təşkil olundu - FOTO

28 Sentyabr 2022 18:22
Baxış: 442

Kiçik və Orta Biznesin İnkişafı Agentliyi (KOBİA) yanında İctimai Şuranın təşkilatçılığı, Kənd Təsərrüfatı Nazirliyinin və Azərbaycan Sahibkarlar (İşəgötürənlər) Təşkilatları Milli Konfederasiyasının dəstəyi ilə "Aqrobiznes: yeni imkanlar və müasir çağırışlar" mövzusunda ictimai müzakirə təşkil olunub.

KOBİA-dan bildirilib ki, tədbirdə aqrar sahədə fəaliyyət göstərən dövlət və özəl qurumların, biznes assosiasiyaların təmsilçiləri iştirak ediblər.

İctimai müzakirədə iştirak edən kənd təsərrüfatı naziri İnam Kərimov ölkədə aqrobiznes sahələrinin inkişafı üçün daha əlverişli mühitin yaradılmasının dövlət başçısının rəhbərliyi ilə həyata keçirilən sosial-iqtisadi inkişaf siyasətinin prioritet vəzifələrindən olduğunu vurğulayıb. Qeyd edilib ki, dünyada iqtisadi, ekoloji, o cümlədən iqlim dəyişikliyi kimi yeni çağırışlar yaranıb. Məqsədimiz yeni çağırışlara uyğun olaraq yeni və müasir aqrobiznes mühitinin daim qorunub saxlanılmasıdır. Bu kimi ictimai müzakirələr aqrobiznesin inkişafında rolu olan tərəfləri bir araya gətirərək beynəlxalq və yerli təcrübəni, mövcud vəziyyəti, imkanları, o cümlədən, qarşıya çıxan çətinlikləri aradan qaldırmaq üçün üsul və vasitələrin müəyyənləşdirilməsi baxımından vacibdir. Nazir İnam Kərimov aqrobiznes sahələri üzrə həyata keçirilən dəstək tədbirləri barədə də məlumat verib.

Azərbaycan Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev qeyd edib ki, məşğul əhalinin 35%-i kənd təsərrüfatı sahəsində çalışır. 1 sentyabr 2022-ci il tarixinə kənd təsərrüfatına 598,8 milyon manat kredit ayrılıb ki, bu cəmi kredit qoyuluşunun 3,1%-ni təşkil edir. Məşğul əhalinin böyük bir hissəsini əhatə etməsinə baxmayaraq, bu sahənin kreditləşmə səviyyəsi məqbul deyil. Bu sahə ilə məşğul olan iş adamları kreditləşmənin özündə sığorta mexanizminin təkmilləşdirilməsini təklif edirlər. Kreditləşmədə sığorta mexanizminin təkmilləşdirilməsi həm də girov probleminin həllinə nail olmağa yardım edə bilər.

KOBİA-nın İdarə Heyətinin sədri Orxan Məmmədov Agentliyin aqrobiznes fəaliyyətinin qurulmasına və inkişaf etdirilməsinə yönəlik dəstək mexanizmləri barədə məlumat verib, kənd təsərrüfatının istehsal, emal və satış istiqamətlərində biznesin inkişafına və sahibkarlıq subyektlərinin qarşılaşdıqları çətinliklərə dair fikirlərini bölüşüb, müxtəlif təkliflər səsləndirib. Qeyd olunub ki, aqrar sığorta mexanizminin geniş tətbiq edilməməsi, suvarma suyu ilə bağlı çətinliklər, keyfiyyətli aqronom və digər məsləhət xidmətlərinin əlçatan olmaması, subsidiya və digər maliyyələşdirmə mexanizmlərinin təkmilləşdirilməsinə ehtiyac, qida təhlükəsizliyi sayəsində sənədləşdirmə prosedurlarının çətinliyi, texnoloji avadanlıqların köhnəlməsi, bazarlara çıxış və s. aqrar sahədə fəaliyyət göstərən sahibkarları narahat edən başlıca məsələlərdir.

KOBİA yanında İctimai Şuranın sədri Fərhad Qaraşov Agentlik yanında İctimai Şuranın təşkilatçılığı ilə iqtisadiyyatın müxtəlif sektorlarında fəaliyyət göstərən kiçik və orta biznes subyektlərinin, müvafiq dövlət qurumlarının və vətəndaş cəmiyyəti institutlarının iştirakı ilə prioritet mövzularda ictimai müzakirələrin növbəti aylarda da davam etdiriləcəyini bildirib.

Tədbirdə sahibkarların sektorun inkişafına dair təklifləri və qarşılaşdıqları çətinliklər dinlənilib, aidiyyəti dövlət qurumlarının nümayəndələri tərəfindən sahibkarların sualları cavablandırılıb.

Milli.Az

Məqaləyə dair fotomateriallar:

13,99%-dən 40 000 AZN-dək zaminsiz, komissiyasız KREDİT
Azernews Newspaper

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics