Mədəniyyət

Böyük Teatrın aparıcı solistləri “Don Kixot“ baletinin tamaşasında çıxış edəcəklər

25 Noyabr 2021 12:01

0 Şərh Baxış: 691

VTB-də minimal faiz dərəcəsi ilə nağd kredit 9.9%-dən

Dekabrın 18-də Azərbaycan Dövlət Akademik Opera və Balet Teatrında L. Minkusun "Don Kixot" baletinin tamaşası keçiriləcəkdir. Tamaşada Rusiya Akademik Böyük Teatrının solistləri, balet artistlərinin beynəlxalq müsabiqələrinin laureatları Kristina Kretova ( Kitri ) və İqor Svirko ( Bazil ) iştirak edəcəklər. Uzun illərdən bəri teatrın repertuarında olan bu balet tamaşaçıların ən çox sevdiyi klassik baletlərdəndir. Şən musiqi, mürəkkəb xoreoqrafiya, sevgi üzərində qurulmuş sujet xətti tamaşaya bayram əhval-ruhiyyəsi verir. Parlaq, coşqun, ehtiraslı və gözəl ispan rəqsləri, çoxsaylı balet tryukləri və dünyada çox məşhur olan balet elementi-fuete tamaşanı daha baxımlı edir.

Teatr rəhbərliyi K. Kretova və İ. Svirkonu heç də təsadüfən bu tamaşaya dəvət etməmişdir. Hazırda bu cütlük dünyada çox tanınmış və tələb olunan balet ulduzlarıdır. Onlar dünyanın bir çox ölkələrində - Almaniya, Fransa, İsveçrə, İspaniya, Portuqaliya, İtaliya, Böyük Britaniya, Yaponiya, Meksika, Çin və s. ölkələrində qastrol səfərlərində uğurla çıxış etmişlər. Qastrolçularla yanaşı tamaşada Teatrımızın balet truppasının aparıcı solistləri - əmək artistlər Samir Səmədov, Cəmilə Kərimova, Elmira Süleymanova, solistlərdən Ayan Eyvazova, Teymur Oduşev və b. iştirak edəcəklər.

Tamaşanı dirijorların Antal Dorati adına beynəlxalq müsabiqənin laureatı Orxan Həşimov idarə edəcəkdir.

İnformasiya dəstəyi - Trend.az, Day.az, Milli.Az