“Su və rəng ahəngi-2021” akvarel sərgisi çərçivəsində müzakirə keçirilib - FOTO

Beynəlxalq Suluboya Cəmiyyəti (İWS Globe) Azərbaycandakı nümayəndəliyi olan "IWS Azerbaijan"ın və Xətai Sənət Mərkəzinin nəzdində açılmış "İWS Baku Khatai Art Gallery"nin təşkilatçılığı, Mədəniyyət Nazirliyi, Rəssamlar İttifaqı və Azərbaycan Dövlət Rəsm Qalereyasının dəstəyi ilə -də "Su və rəng ahəngi-2021" akvarel sərgisi çərçivəsində müzakirə keçirilmişdir. 

Azərbaycan Dövlət Rəsm Qalereyasının direktoru Qalib Qasımovun moderatorluğu ilə keçirilən müzakirədə akvarel sənətinin bugünkü inkişafı, Azərbaycan rəssamlarının zaman-zaman işləməyə üstünlük verdiyi bu texnikanın tətbiqinə, qədim ənənələrə malik sahənin inkişaf tendensiyalarına və ölkəmizdə keçirilən akvarel sərgisinin əhəmiyyətinə toxunulmuşdur. 

Tədbirdə "Xətai" Sənət Mərkəzinin rəhbəri Zahid Əvəzov, Beynəlxalq Suluboya Cəmiyyətinin (İWS Globe) Azərbaycandakı nümayəndəliyinin rəhbəri, rəssam, akvarelçi Xasay Mirzəyev, Əməkdar incəsənət xadimi, sənətşünas Azərbaycan Dövlət Rəssamlıq Akademiyasının professoru Ziyadxan Əliyev, Beynəlxalq Suluboya Cəmiyyətinin (İWS Globe) Azərbaycandakı nümayəndəliyinin rəhbərinin müavini Səbinə İskəndərova, sənətşünas Anar İskəndərov, akvarelçi rəssamlar Cəlal Ağayev, Əbdüləmi Əliyev, İntiqam Cəfərov, Pərviz Əliyev, Rəfael Əliyev çıxış edərək, Azərbaycan rəssamlarının yüksək bədii dəyərə malik yeni akvarel əsərlərinin üzə çıxarılması, nümayişi, bu sənətin gələcək inkişafı üçün stimul yaradılması məqsədilə təkliflər irəli sürdülər. 

Beynəlxalq Suluboya Cəmiyyətinin (İWS Globe) təsisçisi və prezidenti rəhbəri, məşhur Türk rəssamı Atanur Doğan onlayn qaydada müzakirələrə qatılmış, dünyada və Türkiyədə bu sahədə görülən işlərə dair məlumat vermiş, Azərbaycanda belə tədbirlərin keçirilməsinin zəruriliyini və əhəmiyyətini qeyd etmişdir. 

Qeyd edək ki, müzakirələrdən sonra səsləndirilən təkliflərin qiymətləndirilməsi, təhlili nəticəsində gələcəkdə akvarel sənətinin inkişafı və rəssamlarımızın tanıdılması ilə bağlı tədbirlərin ardıcıl surətdə davam etdirilməsi, ustad dərslərinin, vebinarların keçirilməsi və digər işlərin görülməsi qərara alınmışdır.

İnformasiya dəstəyi- Trend.az, Day.az, Milli.Az