Yazıçı Elçin Hüseynbəylinin yubileyi qeyd edilib

Dekabrın 21-də Azərbaycan Yazıçılar Birliyinin (AYB) "Natəvan" klubunda tanınmış yazıçı-dramaturq, "Ulduz" jurnalının baş redaktoru Elçin Hüseynbəylinin anadan olmasının 50 illiyinə həsr edilmiş yubiley tədbiri keçirilib. AzərTAc xəbər verir ki, AYB-in sədri, xalq yazıçısı Anar yubilyarın yaradıcılığı haqqında məlumat vermişdir. Onun son illərdə müasir ədəbiyyatımıza bəxş etdiyi roman və povestlər, dram əsərləri, esselər, hekayə və publisistik yazıların nəinki Azərbaycanda, hətta ölkənin hüdudlarından kənarda da nəşr olunduğunu, ədəbi mühitimizə şöhrət gətirdiyini bildirib.

Azərbaycan Milli Elmlər Akademiyasının müxbir üzvü, Milli Məclisin mədəniyyət komitəsinin sədri, Əməkdar Elm Xadimi Nizami Cəfərov E.Hüseynbəylini əsərlərində Azərbaycan ziyalısı təfəkkürünü əhatə edən yazıçı, naşir və səmimi dost kimi səciyyələndirib.

Mədəniyyət və Turizm Nazirliyinin sektor müdiri Çingiz Əlioğlu E.Hüseynbəylini çox istedadlı və xoşbəxt sənətkar olduğunu diqqətə çatdırıb.

AYB-in katibləri, xalq şairi Fikrət Qoca, xalq yazıçısı Çingiz Abdullayev, şair İlyas Tapdıq yubilyarı dünya ədəbiyyatının mövcud təcrübəsindən bəhrələnən, tariximizə ayna tutan bir yaradıcı ziyalı kimi xarakterizə ediblər.

Çıxış edənlər qocalığın gəncliyini yaşayan, sözünü deməyə hər zaman meydan tapan yazıçını "Balıq adam", "Tut ağacı boyunca", "Don Juan", "Yovşan qağayılar", "Şah Abbas" romanları, eləcə də çoxsaylı pyes, hekayə və publisistik məqalələri ilə fikir dünyamıza, ədəbiyyatımıza layiqli töhfələr verən qələm sahibi kimi yüksək qiymətləndiriblər.

Tədbirdə AYB-in katibləri Arif Əmrahoğlu, Rəşad Məcid öz həmkarlarını təbrik edib, "Vektor" nəşrlər evinin direktoru, şair Elçin İsgəndərli qələm dostunu 7 milyard əhalisi olan dünyanın ən xoşbəxt nümayəndəsi adlandırmış və ona 50 yaşının tamam olması münasibətilə Moskvadakı Beynəlxalq Mükafatlar Birliyinin "Şərəf və vicdan" mükafatını təqdim edib.

Sonda E.Hüseynbəyli tədbirin təşkilatçılarına və iştirakçılarına minnətdarlığını bildirmiş, yeni yaradıcılıq planlarından danışıb.

Milli.Az