"Jam SS" teatr studiyası tərəfindən hazırlanan "La La Land" myuziklının premyerası baş tutdu - FOTO

Rəşid Behbudov adına Dövlət Mahnı Teatrı səhnəsində "Jam SS" teatr studiyası tərəfindən hazırlanan La La Land myuziklının premyerası baş tutdu. Tamaşa Beynəlxalq Qadınlar Günü münasibətilə təqdim olunaraq tamaşaçılar üçün gözəl bayram hədiyyəsinə çevrildi.

Quruluşun rejissorları gənc və istedadlı yaradıcılar - Delyara Mursalova və Margarita Ismailova oldular. Onların yaradıcı baxışı sayəsində səhnədə arzular şəhəri olan Los-Ancelesin atmosferi canlandırıldı; burada qəhrəmanların taleləri sevgi, yaradıcılıq və karyera arzuları arasında formalaşır.

Myuzikldə baş rolları Margarita Ismailova və Ceylan Babayev ifa edərək sevgi, xəyallar və seçimlər haqqında təsirli bir hekayə yaratdılar. Onların aktyor oyunu və vokal ifası tamaşaçılara əsərin emosional dərinliyini hiss etdirdi.

Tamaşanın xüsusi cəhətlərindən biri də canlı musiqi oldu. Gənc musiqi qrupu Rumors teatr səhnəsində ilk dəfə çıxış edərək layihəyə güclü enerji və canlı səslənmə qatdı. Canlı vokal, canlı musiqi, dinamik rəqs nömrələri və ifadəli xoreoqrafiya tamaşanı əsl teatr-musiqi hadisəsinə çevirdi.

Təxminən 1 saat 15 dəqiqə davam edən tamaşa ərzində tamaşaçılar Los-Anceles şəhərinin ruhuna səyahət etdilər. Tamaşa karyera arzuları ilə şəxsi həyat arasında seçim mövzusuna toxunaraq insanın uğur naminə nələrdən keçə biləcəyi barədə düşünməyə vadar edir.

Layihə teatr studiyasının rəhbəri Əziz Əzizovun rəhbərliyi ilə həyata keçirilib. Jam SS studiyası bu gün Bakı şəhərində myuzikl janrında sistemli şəkildə fəaliyyət göstərən yeganə kollektivlərdən biridir və teatr, vokal, canlı musiqi və rəqsi bir səhnədə birləşdirir.

Premyera tamaşaçılar tərəfindən böyük coşqu və alqışlarla qarşılandı. Teatr həvəskarlarının fikrincə, tamaşanın səviyyəsi və səhnə həlli dünya musiqili teatrının ən yaxşı ənənələrindən - o cümlədən Broadway səhnələrində təqdim olunan layihələrdən heç də geri qalmır.

"La La Land" myuziklinin Bakıdakı premyerası ölkədə musiqili teatrın inkişafında növbəti mühüm addım kimi qiymətləndirilir və bu janrın Azərbaycanda yeni mərhələyə qədəm qoyduğunu göstərir.

İnformasiya dəstəyi -  Trend.Az, Day.Az, Milli.Az, Azernews.Az