Beynəlxalq Muğam Mərkəzində “Gənclərə dəstək” layihəsi iştirakçılarının konserti təqdim edilib - FOTO

Beynəlxalq Muğam Mərkəzinin səhnəsində Üzeyir Hacıbəylinin 140 illik yubileyinə həsr olunmuş XVII Beynəlxalq Musiqi Festivalı çərçivəsində "Gənclərə dəstək" layihəsi iştirakçılarının konserti təqdim edilib.

İlk olaraq Azərbaycan Milli Konservatoriyası nəzdində İncəsənət Gimnaziyasının Xorunun (bədii rəhbər Validə Cəlilova, konsertmeyster Svetlana Əhmədova) ifasında Üzeyir Hacıbəylinin "Leyli və Məcnun" operasından "Şəbi-hicran" xoru səslənib.

Daha sonra musiqili gecədə Qara Qarayev adına Mərkəzi İncəsənət Məktəbinin Xalq Çalğı Alətləri Orkestri (bədii rəhbər Bəturə Əhmədova), konsertmesyterlər - Mirhüseyn Əsədullayev, Hikmət Abdullayev, Ruhulla Dadaşov, Sevinc Kərimova, Rəna Zəkiyeva, Cəfərli Nurlan, Məmmədov Elnur, Çingiz Absəlimov, Züleyxa Usubovanın müşayiəti ilə solistlər - Murad Nəbizadə (xanəndə), Malik Qədimzadə (piano), Fatimə Fərəcova (qanun), Mirnofəl Həsənov (tar), Nurgün Həsənova (kamança), Nilay Quluzadə (xanəndə), Məhəmməd Quluzadə (violin), Məhəmməd Aslanlı (tar)  və "Qanunçular" ansamblı, Ərtoğrul Balayev (piano), Samirə Musayeva (piano), Adnan Kərimli (zərb aləti), İnci Həsənli (piano), Uğur Nəbi (piano) öz ifalarını dinləyicilərə təqdim edib.

Gənc istedadların rəngarəng ifaları ilə zəngin olan bu tədbirdə görkəmli bəstəkar, musiqi mədəniyyətimizin banisi Üzeyir Hacıbəylinin "Leyli və Məcnun", "Koroğlu", "Cəngi", "Qara qız", "Çırpınırdı Qara dəniz", "Fantaziya", "Arşın mal alan" kimi məşhur əsərləri təqdim olunub. Bəstəkar Azər Rzayevin, Fikrət Əmirovun, Süleyman Ələsgərovun və Emil Əfrasiyabın kompozisiyaları  da səsləndirilib.

Sonda AMK-tərkibində İncəsənət Gimnaziyasının Xorunun ifasında Fərhad Bədəlbəylinin "Zəfər marşı" (sözləri Yeganə Axundovanındır) əsəri ilə konsert başa çatıb.

Xatırladaq ki, "Gənclərə dəstək" layihəsi Müslüm Maqomayev adına Azərbaycan Dövlət Akademik Filarmoniyasının həyata keçirdiyi layihədir və əsas məqsədi Azərbaycanda gənc istedadların üzə çıxarılması və dəstəklənməsidir. Layihə ideyasının müəllifi və onun bədii rəhbəri - Filarmoniyanın direktoru Murad Adıgözəl-zadə, layihənin koordinatoru - Filarmoniyanın direktor müavini Ayla Kərimova-Zəkəriyyədir.

İnformasiya dəstəyi -  Trend.Az, Day.Az, Milli.Az