Bakıda Xəzər sahilində ulduzların iştirakı ilə "Opera Günləri"nin möhtəşəm bağlanış gecəsi baş tutub – FOTO

Bakı Dənizkənarı bulvarının mərkəzində əsl opera sehri - Azərbaycan Dövlət Akademik Opera və Balet Teatrının ölkə tarixində ilk dəfə təşkil etdiyi "Opera Günləri" layihəsinin möhtəşəm bağlanış gecəsi baş tutub.

Axşam yalnız klassiklərin pərəstişkarlarını deyil, gözəlliyi, istedadı və ilhamı qiymətləndirən hər kəsi açıq havada toplayan bir musiqi bayramına çevrildi. Səhnədə opera sənətinin ulduzları parıldayırdı, gənc istedadlar çıxış edirdi.

Proqramda həm dünya klassiklərinin inciləri, həm də Azərbaycan bəstəkarlarının incə xoreoqrafik kompozisiyalarla tamamlanan ölməz əsərləri səsləndirilib.

"Layihənin əsas məqsədi klassik musiqi sənətini geniş auditoriyaya çatdırmaq, Azərbaycanın mədəniyyət sahəsinə yeni həyat nəfəsi almaqdır. Bu layihə həm klassik musiqinin təbliği, həm də Milli Opera irsinin qorunması və təbliği baxımından xüsusi əhəmiyyət kəsb edir", - layihənin ideya müəllifi, Əməkdar artist Ramil Qasımov bildirib.

Əməkdar artist Eyyub Quliyevin rəhbərliyi altında Simfonik Orkestrin müşayiəti ilə çıxış ediblər - "Opera Günləri" layihəsinin bədii rəhbəri, teatrın direktoru, dünya şöhrətli ifaçı, Xalq artisti Yusif Eyvazov, Xalq artistləri Fidan Hacıyeva, Azər Zeynalov, Samir Cəfərov, Elçin Həşimov, Əməkdar artistlər Ramil Qasımov, Fərid Əliyev, İnara Babayeva, İlham Nəzərov, Anton Ferştandt, Arzu Əliyeva, Tayyar Bayramov, İlahə Əfəndiyeva, Cahangir Qurbanov, Elnur Əhmədov, vokalçılar Atəş Qarayev, Mahir Tağızadə, Fatimə Cəfərzadə, Orxan Cəlilov, Aytac Şıxalizadə, Rza Xosrovzadə, Nigar Cəfərova, Aytən Məhərrəmova.

Ən maraqlı və gözlənilməz məqamlardan biri də pop ulduzlarının iştirakı idi: Xalq artisti Tünzalə Ağayeva, Əməkdar artist Abbas Bağırov, müğənni İlkin Dovlatov və reper Orxan Zeynallı opera müğənniləri ilə birlikdə emosional duetlər təqdim edərək janrlar arasındakı sərhədləri pozaraq klassikləri yeni nəsillərə açan ifalarla çıxış ediblər. Opera ifaçıları da estrada kompozisiyaları ifa ediblər.

Sonda Polad Bülbüloğlunun "Azərbaycan" kompozisiyasını birlikdə ifa edən artistləri ayaqda alqışlayan tamaşaçıların parlaq alqışları müşayiət olunub.

Yusif Eyvazov layihənin bütün iştirakçılarına, eləcə də "Opera Günləri"ni dəstəkləyənlərə təşəkkürünü bildirib, ölkə tarixində Azərbaycanın mədəni irsinin təbliği və inkişafının davamı olacaq ilk "Balet Günləri"ni elan edib.

Layihə yalnız bir sənət bayramı deyil, gəncləri və tanınmış ustaları, müasirliyi və klassikləri, adət-ənənələri və təcrübələri birləşdirən əsl mədəni körpü oldu.

"Opera Günləri" Azərbaycanda yeni mədəniyyət nəfəsidir!

Xatırladaq ki, iyunun 6-da başlayan "Opera Günləri" çərçivəsində bir sıra əhəmiyyətli tədbirlər keçirilib. Onların arasında Heydər Əliyev Sarayında Üzeyir Hacıbəylinin "Leyli və Məcnun" operası, Azərbaycan Milli Xalça Muzeyində Müslüm Maqomayevin "Şah İsmayıl" operasından fraqmentlər və "Opera Forumu", Azərbaycan Milli İncəsənət Muzeyində Kristof Qlukun "Orfey və Evridika" operasının premyerası, Üzeyir Hacıbəyli adına Bakı Musiqi Akademiyasının Opera Studiyasında Cüzeppe Verdinin "Traviata" operası, Beynəlxalq Muğam Mərkəzində - Azərbaycan peşəkar vokal sənətinin banisi Bülbülün 128 illiyi münasibətilə konsert proqramı və Yusif Eyvazovun master-klassı, Müslüm Maqomayev adına Azərbaycan Dövlət Akademik Filarmoniyasında "Xor simfoniyası gecəsi" konserti, Şirvanşahlar Sarayında Üzeyir Hacıbəylinin "Əsli və Kərəm" operasından parçalar, DTX Mədəniyyət Mərkəzində - Böyük opera ifaçıları Lütfiyar İmanov və Firəngiz Əhmədova, Ağababa Bünyadzadə və Fatma Muxtarovanın xatirə gecələri, Naxçıvanın Heydər Əliyev Sarayında Xalq artistləri Samir Cəfərov, Gülnaz İsmayılova, beynəlxalq müsabiqə laureatı Aytac Şıxalizadənin ustad dərsləri keçirilib.

İnformasiya dəstəyi - Trend.Az, Day.Az, Milli.Az, Azernews.Az