"Bakı mədəniyyətlərin və ideyaların mühüm kəsişmə nöqtəsidir" - VİDEO

Bakı mədəniyyətlərin və ideyaların mühüm kəsişmə nöqtəsidir.

Milli.Az Trend-ə istinadən xəbər verir ki, bunu UNESCO-nun Baş Konfransının 42-ci sessiyasının sədri Simona-Mirela Mikulesku İçərişəhərin UNESCO-nun Ümumdünya İrs Siyahısına daxil edilməsinin 25 illiyinə həsr olunmuş tədbirdə deyib. Tədbir UNESCO-nun Ümumdünya İrs Komitəsinin 47-ci sessiyası çərçivəsində baş tutub.

"Bəzi şəhərlər daşdan, bəziləri isə hekayələrdən inşa olunub. Bakı isə hər ikisini özündə birləşdirir," - deyə o bildirib.

Mikulesku Bakıya səfərini xatırlayaraq, şəhərin zəngin mədəni həyatı ilə bağlı parlaq xatirələrini bölüşüb: "Onun divarlarında Qərb, Ərəb, Fars, Osmanlı təsirlərinin izi var. Bakı lap əvvəldən insanların, ideyaların və dəyərlərin qovuşduğu mühüm yol qovşağı olub".

O, Şirvanşahlar Sarayı, Qız Qalası kimi abidələrin Ümumdünya İrs Siyahısına daxil edilməsinin təkcə qədim daş tikililərin və şəhər quruluşunun deyil, həm də şəhərin dərin antropoloji təbəqələrinin qorunub saxlanılması istiqamətində yeni səylərə ilham verdiyini vurğulayıb. "Bu əsər bəşəriyyətin mədəni sərvətini müəyyən edən irsi və yaddaşı qorumaq məqsədi daşıyır", - deyə Mikulesku qeyd edib.

Bakının canlı ruhundan danışan Mikulesku şəhərin parlaq ənənələri, musiqisi və gündəlik incəsənəti barədə söz açıb, bunların mədəni irs obyektlərindən kənarda da geniş əks-səda doğurduğunu bildirib. O, xüsusilə Bakının inkişaf etmiş caz ənənələrini şəhərin yaradıcı ruhunun göstəricisi kimi vurğulayıb.

"Bakının caz səhnəsi şəhərin tarixi irsini müasir mədəniyyət ifadəsi ilə birləşdirərək onun yaradıcı kimliyinin güclü ifadəsidir", - deyə o bildirib. Bu bədii enerji memarlıqda, dizaynda, kinoda və rəqəmsal innovasiyalarda özünü göstərir, dinamik mədəni mənzərə formalaşdırır.

Qeyd edək ki, UNESCO-nun 6-16 iyul tarixlərində keçirilən Dünya İrs Komitəsinin 47-ci sessiyası çərçivəsində müxtəlif mövzularda tədbirlər təşkil olunub. Bu tədbirlər arasında xüsusi yer tutanlardan biri, 11 iyul tarixində baş tutan və İçərişəhərin UNESCO-nun Dünya İrs Siyahısına daxil edilməsinin 25 illiyinə həsr olunan təqdimat olub.

Tədbir "İçərişəhər" Dövlət Tarix-Memarlıq Qoruğu İdarəsinin təşəbbüsü və Azərbaycan Respublikasının UNESCO üzrə Milli Komissiyasının, Azərbaycanın UNESCO yanında Daimi Nümayəndəliyinin və Trend Beynəlxalq İnformasiya Agentliyinin dəstəyi ilə təşkil olunub. Tədbirin mövzusu - "Dünya irsinin qorunması: İrsin konservasiyası və kommunikasiyası təcrübələri" olub.

"Baku Network"un təşkilatçılığı ilə tədbir zamanı erməni təcavüzü nəticəsində həlak olmuş Azərbaycan jurnalistlərinin xatirəsinə həsr olunmuş bukletlər paylanıb.

Tədbirin moderatoru Azərbaycanın UNESCO-da daimi nümayəndəsi Elman Abdullayev olub.

Tədbirdə mədəni irsin qorunması, bərpası və cəmiyyətə təqdim olunması sahəsində beynəlxalq təcrübə, müasir yanaşmalar və kommunikasiya strategiyaları müzakirə edilib. İştirakçılara "İçərişəhər" Dövlət Tarix-Memarlıq Qoruğu İdarəsinin bu sahədəki fəaliyyəti və əldə olunan nəticələr təqdim olunub.

Milli.Az