Mədəniyyət

Beynəlxalq Muğam Mərkəzində “Pianissimo” adlı duet konsert təqdim olunub - FOTO

21 İyun 2024 13:05

Baxış: 2 267

Beynəlxalq Muğam Mərkəzində Beynəlxalq müsabiqələr laureatı, pianoçu Fəqan Həsənli və bəstəkar, pianoçu, sənətşünaslıq üzrə fəlsəfə doktoru Ülviyyə Kazımovanın ilk duet konserti təqdim edilib. Konsertdə İ.Bax, A.Vivaldi, J.Bize, M.Ravel, Q.Qarayev və digər bəstəkarların solo fortepiano, duet üçün yazdığı orijinal və işləmə əsərləri səsləndirilib.

Qeyd edək ki, pianoçular dəfələrlə eyni səhnəni bölüşsələr də ilk dəfə fortepiano dueti kimi bir araya gəlib konsert proqramı ilə çıxış ediblər. Konsertdə səslənən əsərlər tarixi xronoloji ardıcıllıqla deyil əsərlərin bədii quruluşuna əsasən sıralanıb. İfaçılar konserti zamanı həm də aparıcı qismində çıxış edərək əsərlər barəsində qısa məlumatları tamaşaçıların diqqətinə çatdırıblar. Bu da öz növbəsində konsertin səmimi atmosferdə keçməsinə zəmin yaradıb.

Konsertin proqramı dolğun olması ilə yanaşı klassik musiqidən başlayaraq, impressionizm və müasir musiqiyə qədər geniş diapazonu əhatə edib. Proqram A. Vivaldi mövzuları əsasında, işlənməsi Amerika pianoçusu Greg Andersona məxsus "Göz yaşı yağışı"ilə açılıb, daha sonra Ü.Kazımova fortepiano üçün yazdığı Miniatürləri ifa edib. Həmçinin bəstəkar yeni bəstəsi olan "Yaşanmayan ana xatirəsi" əsərini və Fəqan Həsənli öz işləməsində Fikrət Əmirovun "Mən səni araram" mahnsına improvizasiyanı ilk dəfə təqdim ediblər. Konsert Q.Qarayev- "Yeddi gözəl" baleti əsasında M.Perevertaylonun işlənməsi olan "Gözəllər gözəli" və A.Məlikov "Skerso" əsərinin ifası ilə yekunlaşıb.

İnformasiya dəstəyi - Trend.Az, Day.Az, Milli.Az