Mədəniyyət

Cahangir Cahangirov adına Xorun “Ver sözə ehya” adlı konsert proqramı keçirildi - FOTO

16 May 2024 13:30
Baxış: 695
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Beynəlxalq Muğam Mərkəzinin tabeliyində Cahangir Cahangirov adına Xorun "Ver sözə ehya" adlı  konsert proqramı təqdim olundu. Bəstəkarın xatirəsinə həsr olunan konsert proqramında xor bu dəfə tamaşaçıların görüşünə fərqli repertuar ilə gəldi. Xorun bədii rəhbəri və dirijoru, Əməkdar müəllim Təranə Yusifova tərtib etdiyi proqrama  Ü.Hacıbəyli, Cahangir Cahangirov, Ramiz Mustafayevin əsərləri ilə yanaşı müasir işləmələr də əlavə etmişdi.

Tədbirin aparıcısı Saleh Bağırov ilk olaraq Azərbaycanda xorun yaranma tarixi və inkişafı haqqında məlumat verdi. Müasir xor sənətimiz və onu yaşadanlar xatırlandı.

Daha sonra xorun ifasında bir-birindən maraqlı repertuar təqdim olundu. Xorun konsertinə dəstək verən Xalq artistləri Teyyub Aslanov, Mehriban Zəki, Əməkdar artist Dilarə Əliyeva və ifaçı Vasif Hüseyn muğam, poeziya və etno-caz səpkili duetləri ilə gecəni daha da rövnəqləndiriblər.  Konsertmeyster Əməkdar artist Nərgiz Əliyevanın müşayiəti ilə xorun ifasında həmçinin müasir dövrün yeni işləmələri, xarici bəstəkarların əsərləri ilə sintez nömrələr də səsləndi. Gənc ifaçılar Nigar Cəlilova və Orxan Hüseyn solo ifaları ilə xora dəstək oldular, xalq mahnılarımızdan parçalar, caz imporivizələri ilə bəzədilər proqramı.  Azərbaycan Milli Konservatoriyası tərkibində İncəsənət Gimnaziyasının Xoreoqrafiya şöbəsi şagirdlərinin çıxışları da maraqla qarşılanıb. Rejissor Mirsahib Qabiloğlunun quruluş verdiyi konsert musiqi-poeziya və ifa nömrələrinin həmahəngliyi ilə yadda qaldı. Məhəmməd Füzulinin və müasir dövr şairlərimizin muğam və musiqiyə həsr olunan poeziya nümunələrinin xorun repertuarına uyğun seçilib səslənməsi də tamaşaçıların böyük marağına səbəb oldu.

Xatırladaq ki, Azərbaycanda xor sənətinin yaranması və inkişafı dahi bəstəkar Üzeyir Hacıbəylinin adı ilə bağlıdır. Hazırda Cahangir Cahangirovun adını daşıyan xor kollektivi 1936-cı ildə Üzeyir bəy tərəfindən yaradılıb. Kollektivə bir müddət bəstəkarın özü rəhbərlik edib, bir müddət sonra isə kollektivə rəhbərliyi gənc bəstəkar Cahangir Cahangirova həvalə edib. Üzeyir bəy Azərbaycan xalq mahnılarını xor üçün işləyərək gənc bəstəkarlara da bu işi davam etdirməyi tövsiyə edib. Uzun illər Azərbaycan Televiziya və Radiosunun musiqi kollektivi olmuş kollektivin sənət yolunda Xalq artisti Ramiz Mustafayevin də böyük əməyi var. O, 50-ci illərdən ömrünün sonunadək xorun bədii rəhbəri olub.

Xatırladaq ki, Nazirlər Kabinetinin 31 oktyabr 2023-cü il tarixli qərarı ilə Cahangir Cahangirov adına Xor ştat vahidləri ilə birlikdə Mədəniyyət Nazirliyinin tabeliyindəki Beynəlxalq Muğam Mərkəzinə verilib.

İnformasiya dəstəyi -  Trend.Az, Day.Az, Milli.Az

Məqaləyə dair fotomateriallar:

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.